Baionako tren geltokitik 10:30ean hasi da funtzio publikoaren defentsaren aldeko manifestaldia astearte honetan. Arlo ezberdinetako 1.100 bat pertsona mobilizatu dira, denak elgarrekin, baliabide gehiago eskatzeko funtzio publikoarentzat, lan-sariak emendatuz eta lan baldintzak hobetuz. Ibilbidea hainbat zerbitzu publikotatik pasatzen zen: tren geltokitik, herriko etxetik, auzitegitik, eta amaitzeko ospitalean elkartu dira.

Zerbitzu publikoaren defenditzeko, hainbat arloko langileak hor ziren, hala nola osasungintzakoak, irakaskuntzakoak edota suhiltzaileak. Denek diote gaur egungo baliabide eskasak eta diru murrizketek langileak lanjerrean emaiten dituztela eta horrek herritar guztiengan eragina duela.

Intersindikalak du astearteko manifestaldia antolatu eta LAB sindikatua batu zaio mobilizazioari. Aldiz, LABeko manifestariek erabaki dute beste sindikatuek hautatuko ibilbidea moztea ez komisariaren aitzinetik pasatzeko, Poliziaren errepresioaren aurka direlako. Erabakia manifestaldi denboran denek elgarrekin hartu dute Baionako herriko etxearen aitzinean. Bitan banatu da beraz manifestaldia, ondotik denak ospitalera buruz joateko.