Itsasu zentroko metanizatzaileari ez! Hori da proiektuaren kontra egiteko herritar batzuek Interneten sortu duten petizioaren izena. Baina proiektua zer da xuxen?

Itsasuko Agerrea etxaldean plantatua den Claude Sanzberrok nahiko luke bere metanizatzailea handitu. Nahiz eta azken bi urteetan ez den ibili instalazioa, badu hamabost urte etxaldean dela. Urtean 6.000 tona hondarkin transformatzen zituen Claude Sanzberrok gasaren egiteko eta ondotik elektrikari saltzeko, 3.000 tona etxaldetik eta gaineratekoa kanpotik. Erran digu estatuarekin zuen kontratua finitua denez, horren berritzea ez zela bideragarri, eta ez galtzetan hartzeko, beharko lukeela handitu metanizatzailea, eta gasa saldu berehala. 10.000 tona hondarkinetara pasa nahiko luke.

Laborariaren parean, herritar batzuek Herrizainak izeneko elkartea sortu dute, eta petizio bat muntatu. Hainbat kalte eta traba aitzinean ematen dituzte: kamioinen joan jinak, lur erortze arriskuak, uraren kutsadura arriskuak edota usainak eta harrabotsa.

Agerrea etxaldeko Claude Sanzberrok gure mikroan erran du azken hamabost urteetan ez zela arazorik izan, eta nehor ez dela sekulan pleinitu. Ez du ulertzen nolaz bere proiektuak hainbesteko oposizioa sortzen duen. Metanizatzaileak azkarki kontrolatuak direla azaldu digu, eta azpimarratu du ere petizioak aitzinatzen dituen xifra batzuekin ez dela ados.
Jakin petizioko bultzatzaileekin ere solastatu garela baina ez dutela momentuan elgarrizketarik grabatu nahi izan. Orotara, 1.400 izenpedura bildu dituzte, erdia baino gehiago itsasuarrenak.

Bestalde, Itsasuko hautetsiek ere beren desadostasuna jakinarazi diote laborariari gutun baten bidez, azpimarratuz lekua ez dela egokia, ez dela defenditu nahi duten laborantxa modeloa, eta oro har herritarren kaltetan daitekeela proiektua.