Europako Batzordeak ustekabea izan du parlamentuan. Ursula von der Leyen Batzordeko presidenteak larunbatean sinatu zuen Asuncionen (Paraguai) Europar Batasunaren eta Brasil, Argentina, Paraguai eta Uruguairen (Mercosur) arteko ituna, baina Euroganberak ez berrestea erabaki du eta EBko Justizia Auzitegira bidaliko du.

Mercosurrekin sinatutako akordioaren helburua munduko merkataritza libreko gunerik handienetako bat sortzea da, 700 milioi kontsumitzaile biltzeko asmoz. Hala ere, erakunde ekologistek, gizarte zibilak eta, bereziki, nekazariek akordioa salatu dute eta mobilizazio masiboak egin dituzte Europako erakundeen aurrean.

Europako nekazariak ez dira izan akordioaren aurka urte hauetan argi eta garbi agertu diren bakarrak. Ekologisten ustez, itunak "eragin larriak izango ditu ingurumenean eta gizartean", eta multinazionalei laguntzeko sortu dute.

Justizia Auzitegiak akordioaren hainbat puntu azter ditzala eskatuko dute Europako Parlamentuko kideek. Horietako bat "berrorekatzeko mekanismoa" da. Horren arabera, bi aldeetako batek konpentsazioak eska ditzake –muga-zerga edo kuota gisa –, beste alde batek ezarritako neurri batek itunaren merkataritza-onurak "deuseztatzen edo kaltetzen" dituela uste badu. Horren ondorioz, estatu kideek kontrol zorrotza ezartzeari utz liezaiokete errepresalien beldur, eta hala, Bunge, Cargill edo JBS bezalako multinazional handien interesen alde eginez.