Osakidetzako eta Osasunbideko medikuek hirugarren greba astea hasi dute astelehenean, apirilaren 30era arte iraungo duena. Euskadiko Medikuen Sindikatuak (SME) eta Eskubideen Alde Batutako Medikuen Elkarteak (MUD) elkarretaratzeak egin dituzte astelehenean Donostiako (Gipuzkoa) Unibertsitate Ospitalean, Gurutzetako (Bizkaia) Unibertsitate ospitalean eta Barakaldoko (Bizkaia) Ospitalean. Espainiako Osasun Ministerioak bultzatutako estatutu markoaren aurka egin dute eta estatutu propio bat eskatzen dute, beraien lanaren berezitasuna eta erantzukizuna aitortuko dituena izan duten prestakuntza, lan eta arduraren ondoren.  

Urtarrilean burutu zuten lehen greba astea eta otsailean bigarrena. Hurrengoak maiatzaren 18tik 22ra eta ekainaren 15etik 19ra burutuko dira. CCOO, UGT, CSUF, Satse-FSES eta Cig Saúde sindikatuek osatzen dute estatu mailako negoziazio mahaia, baina LABek kanpoan gelditzea erabaki du. Langileen “nekea eta haserrea” ulertzen dituela adierazi badu ere, azaldu du ez duela grebarekin bat egin planteamenduak ez dituelako “langile guztien beharrizanak” defendatzen eta euskal erakundeek eskumena izan arren Espainia mailan kudeatu nahi dutelako. Hala ere, Garbiñe Aranburu sindikatuko koordinatzaile orokorrak Eusko Jaurlaritzari eskatu dio Radio Euskadin “erantzukizuna har dezala eta zerbait egin dezala greba amaitzeko” . 

Mónica García Espainiako Osasun ministroak bestalde, berriro ere uko egin dio medikuentzako erregulazio esklusiboa egiteari, “kohesioa hautsi eta desberdintasunak sortuko” dituelakoan. SMEk eta Nafarroako Sindikatu Medikoak (SMN) “erantzukizuna besteengan jarri duela” leporatu diote ministroari, eta Pedro Sánchez Espainiako Estatuko presidenteari erabakia “azkar har dezan” eskatu diote.

Alberto Martinez Eusko Jaurlaritzako Osasun sailburuak adierazi du itxaron zerrendak %50 luzatu direla medikuak grebak egiteaz gain eta “presio neurri gisa” arratsaldetan ordu estrak egiteari utzi diotelako. Kirurgiaren kasuan, esaterako, itxaron zerrendak 54 egunekoak izatetik 74koaka izatera igaro direla ziurtatu du.

Pradales, "oso kezkatuta"

Imanol Pradales “oso kezkatuta” azaldu da grebarekin Bizkaia Irratian. “Korapiloa Madrilen” dagoela adierazi du, eta itxaron zerrendak luzatzea Osasun Ministerioak gauzak “ondo ez kudeatzearen” onodrioa dela, Berria-k jaso duenez. Horregatik Garcíari arazoa konpondu arte “mahaian jarraitzeko” eskatu dio. 

Eusko Jaurlaritza medikuekin eta sindikatuekin hitz egiten ari da egoera kudeatzeko. Hala ere, EITBk jaso duenez, grebari “arrisku bat” ikusten dio: “Orain arte egindako lan guztia eta egindako hobekuntzak atzera botatzea”. 

Nafarroako Gobernua medikuekin biltzeko prest

Nafarroako Gobernua ere kezkatuta azaldu da egoerarekin. Osasunbideko medikuek greba egiteaz gain, uko egin diote arratsaldetan ordu estrak egiteari. Nafarroako Gobernuak neurria “bidezkoa” dela uste badu ere, itxaron-zerrendetan izango dituen ondorioek kezka sortu diote.

Medikuekin biltzeko asmoa azaldu du, “haien eskaerak ezagutzeko eta gure aukerek eta indarrean den araudiak uzten diguten neurrian haiei erantzuteko”.