Urtarrilaren 23 eta 31 artean ospatu da Gasteizko zinemaren jaialdiaren 42. edizioa. Larunbatean egin zen amaiera ekitaldian Maspalomas izan da irabazle nagusia, hiru sari eskuratuta: film onenarena, zuzendaritza hoberenarena, Jose Mari Goenaga eta Aitor Arregirentzat eta Jose Ramon Soroizek eskuraturiko gizonezko interpretazio nagusi onenarena. Epaimahaiaren esanetan filmak, zeinak "arriskuak" hartu dituen, "lotsarik gabe" hitz egiten du "gai interesgarria bezain ezezagun den hirugarren adineko homosexualitateari buruz", askatasuna eta zapalkuntza nahiz marjinalitatea landuz.

Maspalomasek irabazitakoez gain, ondorengo sariak ere banatu dira: epaimahaiaren eskutik, gidoi, emakumezko interpretazio nagusi, antzeztaldeko interpretazio eta soinu-banda hoberenarenaren sariak; ikusleen eskutik, film hoberenaren saria; eta Vital Fundazioaren eskutik, Gutako Bat saria.

Alberto Vazquezek eta Francesc Xavier Manuel Ruizek gidoi onenaren saria eskuratu dute Decorado lanarekin; Jone, Batzuetan filmak publikoaren film hoberenaren saria eta Olaia Aguayoren emakumezko interpretazio onenaren saria jaso du; Los domingos filman Nagore Aranburuk aktore taldeko interpretazio onenaren saria jaso du; Gaua filmeko Aranzazu Callejak eta Maite Arroitajauregik soinu banda onenaren saria eta Miguel Garces aktoreari Vital Fundazioak Gutako Bat saria eman dio, ohorezkoa. Jaialdiaren balorazioa egiterakoan, Vital Fundazioak azaldu du 2.600 ikusle baino gehiagok eduki dutela hitzordua euskal zinemarekin.