Martxoaren 3ko sarraskiaren erantzukizuna aitortzeko eskatu dio Eusko Legebiltzarrak Espainiako Gobernuari
1976ko Martxoaren 3ko gertaeren harira, EH Bilduk eta Sumarrek Eusko Legebiltzarrean ostegun honetan egindako eskaerari zuzenketa aurkeztu diote EAJk eta PSE-EEk. Horren arabera, Espainiako Gobernuari eskatuko diote “Estatuak sarraskian izan zuen papera aitortzeko”.
Legebiltzarrean onartutako ebazpenak, halaber, Carlos Arias Navarro orduko Espainiako Gobernuko presidentearen “jarduera neurrigabea” gaitzestea ere eskatuko dio gobernuari. Espainiako Poliziak egun hartan bost langile hil eta dozenaka herritar zauritu zituen Gasteizen.
EH Bildu eta Sumarren ekimenak eskatzen zuen ere 1978ko sanferminetan estatuak izan zuen parte-hartzea eta erantzukizuna onartzea eta, hori aitortuz, Pedro Sánchez presidenteak maila goreneko adierazpen ofiziala egitea.
Adostutako zuzenketak, halaber, biktimen memoria, duintasuna, erreparazioa eta ez errepikapenaren printzipioekiko konpromisoa adieraz dezala eskatzen dio Espainiako Gobernuari. Legebiltzarrak, era berean, babesa eman dio Martxoak 3 Fundazioa oroimenaren esparruan egiten ari den lanari, eta ados agertu da Zaramaga auzoko Asisko San Frantziskoko elizan gertaeren memoriala sortzeari.
Legebiltzarrak, halaber, eskatu die Espainiako Kongresuan ordezkaritza duten euskal alderdiei, bertan Sekretu Ofizialen legea desblokeatze eskatzeko, horrela Martxoaren 3ko informazio ofiziala desklasifikatu ahal izateko.
