Baionako auzitegiak Marieniako lurrak husteko agindu die ELBri eta Lurzaindiari. Ekainaz geroztik abereak sartu zituzten orubean, Boygues higiezinen sustatzaileak bertan egin asmo duen etxebizitzen proiektua geldiarazteko helburuarekin.

Auzitegiak hilabeteko epea eman die ardi jendea eta astoak ateratzeko eta arditegia eraisteko. Hala, jabe pribatuen eskaerari kasu egin dio epaileak, eta gainera, 3.000 euro ordaintzera derrigortu ditu "okupatzaileak", prozedura gastuak beren bizkar jarrita.

ELBk eta Lurzaindiak kaleratutako oharrean auzitegiak emandako hilabeteko epean egin dute azpimarra, jabeek lurrak 48 ordutan uzteko eskaturik baitzuten. Azaldu dutenez, auzitegiak ulertu du abereek ez dietela kalterik egiten lurrei: "Epe hau, afera sakonean negoziatzeko oportunitate bat bezala ikusten dugu. Gure helburua etxe proiektuaren arrastatzea da, Marieniako lurrak izan daitezen behin betiko laborantza baliabide baterako", azaldu dute.

Hala, jakinarazi dute hurrengo asteetan elkartuko direla, aurrera begira egin beharrekoak aztertu eta antolatzeko.

Marieniako lurrak 2009an bihurtu zituzten urbanizagarri, Christian Devez Kanboko auzapez zela. Bera da orain etxebizitza proiektuaren sustatzaile nagusietako bat. Geroztik, herritarrek ekintza ugari egin dituzte proiektua gerarazteko eta laborantzarako mantentzeko; abuztuan ELBko eta Lurzaindiako kide bana epaitegira deitu zituzten ekintza horien ondorioz. 

2026ko martxoan, herri sarrerako lur emankor horietan nekazari batek landatutako garia, ezezagunek produktu kimikoekin kutsatu zutela salatu zuten ELB, Lurzaindia, Ostia, Le Cade eta Nahi Dugun Herria kolektiboek, alokairuzko lur batzuetan legalki ereinda izan arren, eta Marieniako etxebizitza proiektuarekin lotu zuten "bandalismo" hori.