"Azken hamarkadetako elikadura ekoizpena mundu mailako industriarik boteretsuenetako bat bihurtu da; ingurumenari zor zaizkion ardura eta errespetuari erreparatzen ez dion industria. Laborantza eredu biziki kutsakor honen aurrean aterabide konkretu bat jalgitzen ari da laborantzaren sabeletik: Agroekologia. Berrikuntza eta jakintza tradizionala uztartzen dituen, eta ekologia laborantzaren erdigunean kokatzen duen eredua". Horrela kokatu du gaia EHKOlektiboak. 

Horren aurrean, Euskal Herriko hainbat laborari agroekologiaren eredua definitu eta identifikatzeko lanetan dabiltza komunitate bizien eta lur emankorraren arteko harreman orekatua berreraikitzeko. Orain pauso berria eman dute: Mantagorria identifikatzailearen bidez, EHKOlektiboak defendatzen duen eredua indartzea bilatzen du, Euskal Herriko egoerara egokituta, “tokikoa, pertsonen neurrikoa eta eraldatzaile”, sustatzaileen hitzetan. Prozesu honen baitan funtsezko bidelaguna izan da Biharko Lurraren Elkartea, eta helburu nagusia lehen sektorea eta herritarrak saretzea da, hauek ere sistemaren “eragile aktiboak” bihurtu daitezen.

Urriaren 17an Ordizian ospatuko den topalekua eredu bizigarri baten lanetan aurrerapausoa bihurtuko da, Haizea Bengoetxea laborariaren hitzetan “kolektiboan elkartzea baita gure indargunea”.