Madrilgo Errepresioaren Aurkako Mugimenduak (MAR Madrid) publikoki salatu du mugimendu eta antolakunde sozialen aurkako espioitza politikoko operazio berri bat, hiriburuko mugimendu sozialetan infiltratutako beste polizia-agente bat atzeman baitute. Espainiako Poliziako funtzionarioak "Fatima Garcia Vazquez" nortasun faltsua erabili zuen, 2023. urtearen amaieratik, egitura militanteetan sartzeko; tartean, MAR Madrid bera, alderdi politiko bat eta Palestinarekiko elkartasun-talde bat. Kolektiboak bere komunikatuan zehazten duenez, agentea ingurune politikoetatik kanporatu zuten 2025. urtearen hasieran, militantziak aurrez aurre bera konfrontatu ondoren. Hala ere, bere benetako nortasuna ez dute orain arte jakinarazi, informazioaren egiazkotasuna ziurtatzeko eta beste lurralde batzuetan infiltrazio berriak prebenitzeko.

Estatuaren espioitza-operazio honi aurrez etxebizitzaren edota independentismo katalanaren aldeko mugimenduetan antzemandako beste kasu ugari gehitu behar zaizkio, disidentzia politikoa monitorizatzeko Espainiako Gobernuko Barne Ministerioak duen estrategia sistematikoa berretsiz. MAR Madridetik adierazi dutenez, infiltrazio honek jomugan izan ditu "mobilizazioa eta borroka kontsekuenteen diren espazioak", bereziki, erresistentzia palestinarrarekiko elkartasun-lana eta biolentzia instituzionalaren salaketa. Taldeak azpimarratu duenez, estatuak "hobetu" egin ditu ezkutatzeko metodoak, eta horrek zaildu egin du kanpoko froga grafikoak edo dokumentalak lortzea. Hori dela eta, kaltetuak "zainketa militantearen" eta segurtasuneko barne-protokoloen mende egon behar izan dira agentea detektatzeko. 

MAR Madridek salatu duenez, Espainiako Gobernuak kontrol-mekanismo horiek erabiltzen ditu ezarritako ordena zalantzan jartzen dutenak "zelatatzeko, kontrolatzeko eta jazartzeko", "eskubide eta askatasun demokratikoen errespetuari" buruzko erretorika ofizialaren aurka eginez. "Errepresio-praktika horiei aurre egiteko modu eraginkor bakarra antolatzea eta lehen lerroan aurre egitea da", dio komunikatuak; eta baztertu egiten du agenteak detektatzeko "errezeta magikoak eta formula zehaztuak eta bukatuak" egotea. Horregatik, espazio militanteen arteko lankidetza aktiboa galdegiten du, estatuak "bere akatsetatik ikasten" duela gogoraraziz. Kasu honetan, MARek esan du norabide argi batean zentratu zela infiltratutako poliziaren jarduna: nazioarteko politikaren eta giza-eskubideen arloan gobernuaren hipokrisia seinalatu duten antolakundeetan.

MARek "autodefentsa kolektiborako" neurri gisa justifikatzen du poliziaren nortasuna argitaratzea, beste esparru batzuetan "espioitza-lanik egin ez dezan". Kolektiboak estatuaren errepresio-aparatuaren joera historiko batekin lotzen du infiltrazioa, hau da, mugimenduak "esbirroen" bidez desegiteko saiakerarekin, erabakitzeko eta parte hartzeko guneetan esku hartuz. Kasu honen zabalpenarekin, elkartzeko eta parte-hartze politikorako eskubideen urraketa sistematikoa ikusarazi nahi dute kaltetutako kolektiboek (urraketa hori NBEren instantzietara heldu da jada), eta zuzenean seinalatzen dituzte polizia-indarren arduradunak langile- eta herri-mugimenduaren aurkako zaintza ideologikorako estrategia betearazteagatik.

Polizia urtebetean baino gehiagoan egon zen infiltratuta, baina kaltetutako antolakundeek azaldu dutenez, estatuak ez zuen lortu modu horretan "minik egitea", ezta jada publikoa ez zen informaziorik lortzea ere. "Ez dute inolako informazio sentikorrik ateratzea lortu, ezta gure borroka-morala haustea ere", dio MARen komunikatuak, eta gertatutakoa langileen eta antifaxisten arteko elkartasunean "ahaleginak areagotzeko" arrazoia dela uste du. "Fatimaren" kasua eredu operatibo baten barruan kokatzen da, non estatuak ezkerreko kolektiboetan infiltratutako agenteak erabiltzen dituen.