Ministerioak aurkeztutako proiektuak "gure bailara eta bertako biztanleen beharrak" ez dituela aintzat hartzen salatu du Tren Sozialaren aldeko Plataformak. Lurralde-kohesioa bermatu, ingurumena errespetatu eta bideragarritasun ekonomikoa ahalbidetuko duen ereduaren alde egin du kolektiboak, eta esan du horretarako trenbide-sarea modernizatu, merkantziak trenez garraiatzea bultzatu, herri eta eskualdeetako geltokien arteko konexioak hobetu eta trenen maiztasuna areagotu beharko liraatekeela. "Proposamen honekin aldirietako eta eskualdeetako konexioak hobetuko lirateke, geltoki guztiak berrituko lirateke, eta berri batzuk ireki, geralekuak berreskuratuko lirateke eta ingurumen inpaktua askoz ere txikiagoa izango litzateke", adierazi du plataformak. "Era berean, abiadura handiko distantzia luzeko zerbitzua barne hartuko luke, eta eskaera guztia trenbide-plataforma bakar batekin bete". Alegia, Tren Sozialaren alternatibak egungo trazatua balitzea proposatzen du, berrituta, tren konbentizonaleko azpiegiturak eta geltokiak zaharkituak ari direlako geratzen, inbertsioak AHTn egiten ari direlako.

Aurkeztutako alternatiba herri-plataformen eta Adif eta Renfen ordezkaritza duten sindikatu guztien artean lortutako akordioaren fruitu dela azaldu dute Uharte Arakilen bildutakoek, eta helburutzat duela konponbide erreal eta teknikoki bideragarri bat eskaintzea. Egungo azpiegitura modernizatu eta egokituta, zerbitzuak segurtasunean ere hobera egingo lukeela diote: "Lurperatzeak ere planteatuko dira, Altsasun eta Agurainen, adibidez, hiri-integrazio hobea lortuz".

Plataformak adierazi du diru falta dela-eta Hendaia eta Bordele arteko abiadura handiko tren-azpiegitura berriaren proiektua arriskuan dagoela, eta Irun, Baiona eta Bordeleko alkateek egungo trenbide-trazadura hobetzeko proposamena egin ondoren, alternatibak eta obrak gelditzeko eskaerak "inoiz baino indar handiagoa" hartzen dutela. Halaber, gogorarazi du Sakanako alkateen %93a Iruñea eta "Euskal Y"-ren arteko konexioa jada eraikita dagoen bidetik egitearen alde dagoela: "Horregatik eskatzen dugu herriaren borondatea errespetatzea, trenbide-azpiegitura berri bat eraikitzeko proiektua gelditzea eta planteatutako alternatiba aurrera eramatea".

Bukatzeko, martxoaren 14an "AHTren txikizioaren aurka" Altsasun egingo den manifestazioan parte hartzeko deia luzatu dute.

"Estatuak Gasteiz aukeratu du"