Elige tu cama enpresaren egoitza ez dute itxi jarduera ilegala zuelako, legala baita etxebizitza bat gelaka berralokatzea. Baldintza teknikoak ez zituen betetzen negozioak eta Gasteizko Udalak zigilatu egin du. Auzo elkarteak badaki haien lanaren ondorioz lortutako emaitza “garaipen txiki bat” dela, bai baitakite enpresak ez dituela ateak itxi eta etxebizitzak gelaka berralokatzen jarraituko duela. Hiruzpalau urte dira Gasteizen diharduela eta Judimendi auzoan zabaltzeko asmoa zuen. Bulegoa ixtea lortuta, enpresak auzoan ikusgarritasuna galduko duela uste du auzo elkarteak.

Auzoko eragileen kanpainari esker

Batutak (Judimendiko Elkartasun Sarea), Sumendi elkarteak, Judimendiko Gazte Asanbladak eta Ernai Judimendik egin zuten salaketa. Urtarrilean, prentsa-oharrean azaldu zutenez, Elige tu cama moduko enpresek etxejabeen segurtasun ezaren eta etxeak okupatzeko arriskuaren “diskurtso oportunistak” erabiltzen dituzte, sare sozialak eta mezu sentsazionalistak baliatuta. Etxejabeei maizterrekin bitartekaritza lanak egitea eskaintzen diete, jabeei segurtasuna eskainita, eta enpresak, trukean, "irabaziak lortzen ditu”.

Eragileek enpresak etxebizitzen kudeaketaren arduradun egitearen ondorioak zerrendatu dituzte: gelakako kontratuak (500 eurora irits daitezkeenak), klausula itogarriak, zorroztasuna ordainketen epeetan, fidantzen kudeaketa inpertsonala eta gehiegizkoa, legez kanpoko etxegabetze saiakerak, eta horien legitimitatea ohiko praktika bihurtzea.

Praktika horien ondorioz, alokairuen prezioak igotzen direla salatu dute eta etxebizitza eskuragarrien kopurua murriztu egiten dela.

Etxebizitza arazo larria auzoan

Judimendi auzoan etxebizitzaren arazoa ez da berria. Aspalditik bizi duten egoera deskribatu dute eragileek: gazteak gurasoen etxetik atera ezinda dabiltza, alokairuen prezioak ordainezinak dira, alokatzerakoan pertsona arrazializatuek gero eta oztopo gehiago dituzte, etxebizitza erostea ia ezinezkoa da. Gogorarazi dute auzokideen bizitzak “gero eta prekarioagoak” direla, eta halako negozioek “hori sustatu baino ez dutela egiten”. Gehitu dute ez dutela haien “miseria handituko duen negozio espekulatzailerik nahi” euren auzoan.