Arabako Foru Aldundiak jakitera eman duenez, langile bat hil da asteartean, 20:00ak aldera, Goiaingo (Araba) industrialdeko enpresa batean. Ezbeharraren lekura bertaratu dira Gasteizko eta Langraizko parkeetako suhiltzaileak, ertzainak eta anbulantzia bat. Langilea artatu badute ere, bertan hil da. El Correo-ren arabera, ezbeharra egurra lantzen duen Egoin taldeko kanpo-enpresa batean gertatu da. Oraingoz, ez dute jakinarazi zergatik gertatu den lan istripua, eta ikertzen ari dira.

2026an Araban hiltzen den bigarren behargina da. Duela hilabete eskas, otsailaren 23an, Berguendako kontzejuko FML piroteknia enpresan izandako leherketa indartsu batek langile bat hil zuen eta beste bat larriki zauritu zuen. LAB sindikatuaren arabera, 2025ean 74 langile hil ziren lanean Euskal Herrian, eta aurten dagoeneko 11 dira.