Matarredos eta Las Llanas inguruko mendi-bideetan baimenik gabe eraikuntza lanak egiten ari direla-eta, Labrazako Kontzeju Irekiak espedientea zabaldu du eta eskatu du obra hauek "berehala gelditzea". Kontzejuak gaiari buruzko batzar berezia egin zuen 2025eko abenduaren 18an eta orduan hartu zen erabakia, eta urtarrilaren 30ean egin da publiko Arabako Buletin Ofizialean (hemen eskuragarri).

Bertan irakur daitekeenez, ebazpenaren aurkako administrazio-bidea agortuta dago eta hauek dira errekurtsoa jartzeko zabalik dauden bideak: batetik, administrazioarekiko auzi-errekurtsoa jartzea Administrazioarekiko Auzien Epaitegian, jakinarazpena egin eta bi hilabeteko epean. Eta bestetik, berraztertzeko errekurtsoa aurkeztea kontzejuan bertan, jakinarazpena egin eta hilabeteko epean, baina kasu horretan, ezingo da errekurtsorik jarri.

Labrazako Kontzejuaren ebazpenak zehazten du "berehala bete beharrekoa" dela, eta errekurtsoa jartzeak ez duela betearazpena eteten. Baina kautelazko etena eskatu ahalko dela epaitegietan.

Labrazako eolikoen makroproiektua

2025eko azaroaren 20an eraikuntza lanak hasi zirela iragarri zuen Jaurlaritzak. Bertan irakur daitekeenez, Iberdrolak eta Energiaren Euskal Erakundeak elkarrekin sortu duten Aixeindar sozietateak sustatutako proiektua da eta Nafarroako Ecay enpresari esleitu dizkio obrak.