Hego Euskal Herriko lau hiriburuetan elkarretaratzeak deitu ditu SOS Kultura plataformak ostiral honetan. 12:30ean egingo dira, Bilboko Arriaga plazan, Donostiako Boulevardeko kioskoan, Gasteizko Andra Mari Zuriaren plazan eta Iruñeko Udaletxe plazan.

Alarma egoerak larrialdia eragin du kultur alorreko langileen artean, baina plataformak azaldu duenez, ez dira horregatik bakarrik elkartuko: COVID-19aren pandemia agertu baino lehen ere prekarietate handia zegoen sektorean. Beraz, alarma egoeratik harago, instituzio publikoek kulturarentzat konponbiderik eskaintzen ez dutela adierazteko bilduko dira ostiral eguerdi honetan.

Lau hiriburuetan egingo diren mobilizazioak desberdinak izango dira, baina manifestu bateratu bat irakurriko dute.

Larunbat honetan berriz, auto-karabana deitu du Kupla plataformak. Aste honetan sortu da elkarte hori eta teknikariak, enpresak eta artistak batzeko asmoa dauka. Erakunde publikoen inmobilismoa salatu dute plazaratu duten lehen agirian eta ohartarazi dute zerbait egiten ez bada laster ez dela posible izango egoerari buelta ematea.

Hori da auto-karabanarekin zabaldu nahi duten mezua ere: "Kulturaren hileta" eszenifikatu nahi dute. Horretarako, 11:00etan elkartuko dira Gasteizko Gobeo Hotelaren parean (hirira autoz doazenentzat) eta 11:45ean Lakuan. Larunbat eguerdian, "kultura hila" aterako dute eta Eusko Jaurlaritzaren parean utziko dute.

Ez da kulturgileek azken hilabeteetan martxan jarri duten ekimen bakarra: konfinamendu betean, greba digitala egin zuten, programazioak bertan behera geratu ondoren arloko profesional asko bizitzen ari ziren egoera salatzeko. Euskal Herriko erakunde publikoek hainbat neurri iragarri zituzten alarma egoeran, baina ez dirudi sektoreko profesionalen premiak asetzeko lain izan direnik.