Otsailaren 25ean Cayo Falcosen kostako iparraldetik 1,6 kilometrotara egondako tiroketan lau hildako eta sei zauritu dira, Kubako Barne Ministroak jakinarazi duenaren arabera, eldiariok jaso duenez. Zaurituen artean Kubako kostazainen itsasontziko komandantea topatzen da.

Hamar gizon zihoazen Floridatik (AEB) Kubara hurbiltzen ari zen barkuan eta gobernuak adierazi duenez, eraso-fusilak, arma laburrak, beraiek eraikitako lehergailuak (molotov koktelak), balen aurkako txalekoak eta kamuflai uniformeak zituzten. Nabarmendu dute AEBetan bizi diren kubatarrak direla atzemandakoak eta gehiengoek delitu eta indarkeria aurrekariak dituztela. Horien artean Kubako autoritateak bilatzen dabiltzan Amijail Sánchez González eta Leordan Enrique Cruz Gómez daude eta “ekintza terroristak planifikatzea, antolatzea, finantzatzea, babestea eta horietan parte hartzea” leporatzen zaie.

Itsasontzia uhartera gerturatzen ari zela hartu du esku Kubako kostazainak. Hauen bertsioaren arabera, abisua eman diete, itsasontzitik kostazain bat tirokatuz erantzun dute eta tiroketari izan da. Kubako Gobernuak “subiranotasuna babesteko eta eskualderen egonkortasuna” bermatzeko egindako erantzuna izan dela argitu du eta Kubaren aurkako ekintza terrorista gisa sailkatu du. Ikerketa abiatu dute gertakariak argitzeko.

AEBk tiroketaren aurrean emandako erantzuna

Marco Rubio AEBtako Estatuko idazkariak adierazi du AEBtako Segurtasun Nazionaleko Departamentua eta AEBko kostazainak gertakaria ikertzen ari direla. La Habanako enbaxadara bertaratu dira ikerketari ekiteko eta hamar gizonak AEBtako herritarrak ziren aztertzen ari direla esan dute. Informazio gehiago edukitzean ondorioen erantzukizuna hartuko dutela nabarmendu du. Idazkariak ziurtatu du ez dela AEBtako Gobernuaren operazio bat izan eta ez duela “espekulaziorik” egingo egondako “asmoen” edo “gertakarien” inguruan. James Uthmeier Floridako fiskaltzak fiskalei ikerketan kolaboratzeko agindu die “ezin delako Kubako Gobernuan konfiantzarik izan”. Irmo azaldu du “eskuan dugun guztia egingo dugula komunista hauek amore eman dezaten”.