Eusko Jaurlaritzarentzat "albiste ona" da: "Euskal administrazio publikoen hizkuntza-ereduaren oinarriak babestuta geratzen dira; eta gainera, onartutako lege aldaketak ekarriko digu segurtasun juridiko handiagoa exijentzia gehiagorik gabe". Gaineratu duenez, autoaren arrazoibide zehatza sakon ezagutu zain dauden arren, "Konstituzio Auzitegiaren erabaki honek euskal administrazioek urte luzez eta adostasun zabalekin eraiki dugun eredua babesten du". "Albiste positiboa da", dio, "eredua bere osotasunean indarrean eta babestuta geratzen baita, PPk eta Voxek aurkeztutako errekurtsoak gorabehera".

Bestalde, Jaurlaritzak azaldu du orain arte jasotako epaiak ez direla "legearen artikulatuari buruzkoak" izan, "deialdi jakin batzuen aplikazioari buruzkoak baizik". Hain justu, berriki Legebiltzarrean onartutako aldaketaren helburua da "deialdien inguruan sortu den segurtasun juridikorik ezari erantzutea", gaineratu duenez. "Izan ere, administrazio batzuek legea garatzen duen dekretuaren interpretazio jakin baten arabera egin duten aplikazioa izan da auzitegietan gatazkak eragin dituena".

Jaurlaritzaren hitzetan, onartutako aldaketak hiru irizpide ezartzen ditu hizkuntza eskakizunak proportzionaltasunez zehazteko: "Irizpide horiek arlo honetan garatutako doktrina eta jurisprudentziatik eratorriak dira: errealitate soziolinguistikoa; lanpostuaren izaera eta eginkizunak, baita administrazioaren planifikazioa eta normalizazio linguistikorako helburuak ere; eta herritar guztientzat berme handiagoak eskaintzen dituen eredua.

Euskararen normalizaziora bidean albiste ona, EH Bilduren iritziz

"Oso berri ona da administrazioan euskararen egiazko berdintasuna defendatu dugunontzat eta euskararen normalizazioan aurrera egiteko erabakimena dugunontzat", azaldu du Josu Aztiria EH Bilduko legebiltzarkide eta Euskararen Normalkuntzarako idazkariak. Dena den, nabarmendu du "oldarraldia" ez dela eten, eta koalizioak lanean jarraituko duela "geure hizkuntza nazionalarentzat estatus juridiko berri baten bila".

Eusko Legebiltzarrak, EAJren botoekin eta EH Bilduren abstentzioarekin, Euskal Enplegu Publikoaren erreforma onartu zuen ekainaren 25ean. Erreforma horrek aurrera egin zezan bi alderdiek akordioa sinatu zuten eta agirian argi azpimarratzen da Konstituzio Auzitegiaren ebazpenak eragin zuzena izango zukeela bi alderdiek adostutako lege aldaketan. Aztiriak ARGIAri adierazi dionez, tramitera ez onartuta "oztopo handi bat gainditzen da eta gure estrategiaren funtsa indartzen du".

EAJren iritziz ere "albiste oso ona da" Konstituzio Auzitegiak asteazkenean jakinarazi duena, "administrazio publikoan euskararen normalizazioa bultzatzen duen lege-markoa babesten duelako". Halaber, "euskara babesteko" eta "zarata eta konfrontazioa alde batera uzteko" eskatu du alderdi jeltzaleak.