Gordillok La Sexta kateko "Al Rojo Vivo" programan adierazi du presionatzeko bada ondo deritzola gezurra esan duen Gobernua inguratzeari. Gaineratu du Rajoyren Gobernuak "legitimitate guztia" galdu duela, bere programa traizionatu duelako. "Rajoyk praktikan egin duena aurkeztu izan balu hauteskundeetan, oraintxe bertan ez zuen gehiengo absoluturik izango".

Bestalde, Gaspar Llamazaresek aditzera eman du irailaren 25ean "herritarrekin" izango dela "Kongresua okupatu" deialdiari laguntzeko. Gaineratu du, "logikoa" iruditzen zaiola egungo kondizioak ikusita herritarrak kalean mobilizatzea eta beraien eskubideak defendatzea. Llamazaresek gaineratu du plataformaren "errebindikazio askorekin" bat dagoela.

Gizarte mugimendu "antineoliberal, antikapitalista eta demokratiko" bateko kide diren hainbat herritarrek osatu dute ¡En pie! izeneko plataforma, "demokrazia parte-hartzaile baten" eta "oinarrizko eskubideen" alde lan egiteko asmoarekin. Ingurumari horretan, irailaren 25erako Espainiako Kongresua inguratzera deitu dituzte herritarrak, "Gobernuaren dimisioa eta prozesu konstituziogile bat abian jartzea" lortu arte.

“Kongresua okupatu” Facebookeko deialdian ehunka pertsona ari dira gehitzen egunero eta 37.000 erabiltzaileek baieztatu dute joango direla dagoeneko.