"Espazio publikoa errespetatu edo ordaindu egin behar da", izan dira Gasteizko alkate Maider Etxeberriaren (PSE-EE) hitzak, esku artean daukaten ordenantza berriaren inguruan hitz egitean. Kaleetako "bandalismoari" eta "gizatasun" faltari erantzuteko asmoa duela argudiatuta, gaur egun hainbat ordenantzatan bereizita dauden neurri batzuk elkartu eta aurreikusitako zigorrak berrikusiko ditu udalaren araudi berriak, eta arau-urraketatzat hartuko diren gertaera gehiago ere seinalatu ditu, gainera.

Baina, bilgarri horren azpian, udalak irmotasun handiagoz jazarri nahi du kaleetan aldarriak plazaratzea: esaterako, zigortzeko moduko ekintzen barruan sartu du margoketak egitea eta kartelak baimen ofizialik gabe jartzea. Bestalde, zaku berean sartu du espazio publikoan pixa egitea, animalien kaka ez jasotzea, hondakinak legez kontra isurtzea, edukiontziak erretzea eta beste.

Hainbat hedabidek azaldu dute Gasteizko Udalak kontsulta publiko bat irekiko duela ordenantza berriari buruzko proposamenak eta iruzkinak jasotzeko, eta "gizatasun faltari" aurre egiteko "udal-aliantza" bat aldarrikatu du alkateak, propaganda politikoa egiteko ekintzak ere "gizatasun faltari" lotuz.