Josu Zabala ‘Basajaun’ ETAko militantearen heriotzaren inguruko galdera ugari dago erantzun gabe oraindik. Urteetan zabaldutako bertsio ofizialaren eta Zabalaren familia eta inguru hurbilak eskatzen duten egiaren arteko distantzia handia da. Poliziak esan zuen bere buruaz beste egin zuela, baina heriotzaren frogek bertsio hori zalantzan jar zezaketen. Duela hilabete, Ilunpetik Argira herri ekimenak jakinarazi zuen heriotza nola gertatu zen ikertuko duela, kasuari buruzko datu berri bat aurkeztearekin batera. Orain, Goteoren bidezko finantzaketa kolektiboko kanpaina abiatu berri dute, Basajaun 1997 dokumentala egiteko.

Dokumentalaren proiektua sortu da Josu Zabalaren heriotza “isiltasunera, ahanzturara edo behin betikotzat jotzen den bertsio bakarrera ez mugatzeko” beharretik. Hala, azaldu dutenez, Basajaun 1997 dokumental soil bat baino gehiago izatea nahi dute proiektuaren bultzatzaileek: "Memoriarako, elkarrizketarako eta begirada kritikorako tresna da”. Dokumenta Palomo Filmak-ek ekoiztuko du. 

Orain abiatu duten fasea finantzaketa kolektiboarena da, Goteo plataformaren bitartez. Hala, bultzada eman nahi diote proiektuari, eta finkatu dituzten helburuak betetzen joan: dokumentalaren ekoizpen eta postprodukzio fasea bultzatzea; ikerketa independente eta zorrotz bati eustea; balio kultural, sozial eta zinematografikoa duen dokumental bat eraikitzea; Josu Zabala Salegiren kasuaren inguruko memoria publikoan laguntzea; dokumentalaren etorkizuneko hedapena erraztea proiekzio, solasaldi eta espazio kulturaletan; eta laguntza-komunitate bat sortzea, haren amaiera eta zirkulazioa ahalbidetzeko.