EHU Jaurlaritzarekin bilduko da, selektibitate edo USAPeko euskarako proben inguruan jasotako auto judizialaren ondorioak aztertzeko. Epaitegiek hainbat ikasleren helegitea onartu dute eta agindu dute ez hartzeko kontuan, batez bestekoa egiterakoan, Euskara eta Literatura II azterketaren nota, horietan izandako zeroak direla-eta. 

EHUk iragarri du autoa errekurritu egingo duela, "gainerako ikasleriarekiko ageriko bidegabeko desberdintasuna eragiten duela iritzita". Ohar bidez jakinarazi du Joxerramon Bengoetxea errektorea Jaurlaritzako Zientzia, Unibertsitate eta Berrikuntza sailburu Juan Ignacio Pérezekin batzartuko dela, autoaren aplikazioak USAPeko azterketak egin dituzten gainerako ikasleriari "kalterik ez eragiteko" eta "prozedurari eragiten dion erabaki baten aurrean adostutako erantzuna emateko".

Bestalde, Bengoetxeak Euskadi Irratian ziurtatu du ez dela egia "ikasleen anonimotasuna hautsi denik", eta bere hitzak El Mundo egunkariak modu interesatuan terstuingurutik kanpo hartu dituela salatu du: "Nik literalki esan nuena da ezin dela jakin ikasle bat zein ikastetxekoa den eta ez alderantzizkoa", argitu du.

EH Bilduren gaitzezpena

EH Bilduk, bere aldetik "irmoki" gaitsetsi du auzitegien agindua. Bere esanetan, "bidegabekeria da milaka ikaslerentzat", eta salatu du interesa dagoela euskara eta EHU "jomugan" jartzeko.

"Burbuila mediatikoaren eta azken orduetan ezagututako erabaki judizialen atzean bultzada politiko argia dago, eta hori guztia duela hilabete batzuetatik salatzen ari garen euskararen aurkako ofentsibarekin bat dator", esandu koalizio subiranistak ohar bidez.