"Iraultza Txikien Kanpaldia ekologismoaren, feminismoaren, antimilitarismoaren eta internazionalismoaren inguruan behetik topo egiteko, eztabaidatzeko, ikasteko, antolatzeko eta alternatibak eraikitzeko gunea da", esan dute antolatzaileek. 2018an egin zuten kanpaldia lehen aldiz, Zubietan (Gipuzkoa), eta aurtengoa laugarren edizioa izango da.

Ez da kasualitatea laugarren edizioaren leku gisa Bardeak aukeratu izana: izan ere, Espainiako Gobernuko Defentsa Ministerioak tiro eremua alokatzeko duen kontratua 2028an amaituko zaio, eta orduan erabaki beharko du berritu ala ez. Antolatzaileek nabarmendu dute topaketak "sareak ehuntzeko, konplizitateak sortzeko eta borroka partekatuak bultzatzeko lekua" izango direla.

Hiru eguneko egitaraua

Ostiraletik igandera egitarau oparoa osatu dute herri mugimenduetako kideek: ostiralak arratsaldean izango diren harrera ekitaldia eta Bardeen inguruko hitzaldia edukiko ditu erdigunean, azken hau Bardea Aske taldearen eskutik. Horrez gain, hitzaldi sortak –zehazki, klima aldaketaren, etxebizitza problematikaren eta gorakada erreakzionarioaren inguruan– eta bertso afaria ere izango dituzte.

Larunbatean, berriz, aktualitateko auzi nagusien inguruko hitzaldiak eta mahai inguruak nagusituko dira. Orotara, bederatzi eskainiko dituzte, hirunaka aldi berean –hiru goizean eta beste seiak arratsaldean–, eta honako gai hauek landuko dituzte: Palestinako genozidioa, elikadura burujabetza, errepresioa, arrazakeria, sare libreak, euskara, transfobia eta gerraren negozioa. Eguna amaitzeko, Abby Martin estatubatuarrak eginiko Lurraren etsairik handiena dokumentala eskainiko dute gauean herriko plazan, baita Los Kaguetas taldearen kontzertua ere.

Topaketetako azken egunean, igandean, Bardeetara martxa egingo dute, eta herri bazkaria ondoren. Azkenik, Skabidean talde ezagunak kontzertua eskainiko du. Gainera, azken egun horretan sorpresa gehiago izango direla iragarri dute antolatzaileek.

Izena emateko epea, zabalik

Irekita dago hiru eguneko egitarauean izango diren ekintzetan izena emateko epea, esteka honen bidez.