Mikel Albisuk eta Marixol Iparragirrek uko egin diote Espainiako Audientzia Nazionalean deklaratzeari, Miguel Angel Blanco PPko zinegotziaren hilketaren harira haien kontra hasitako prozeduran. Lehenak, Madrilen esan du jadanik beterik duela Frantziako Estatuak ezarritako zigor osoa. Bigarrenak –Zaballako espetxetik bideokonferentziaz–, gogorarazi du ez zela auzi horrengatik entregatua izan Espainiako Estatura.

Albisu abokatuez, senide eta lagunez eta hainbat politikari eta militantez babestuta joan da Madrilera. Amaia Izko defentsako abokatuetako baten esanetan, deklarazioa "egiazki ondo" joan da, akusazioek ez baitute ETAko buruzagi ohien kontrako behin behinko kartzela zigorrik eskatu. Diginidad y Justiciak, AVTk eta PPk, Albisurentzat "kautelazko neurriak" eskatu dituzte, baina epaileak ez du inolako ebazpenik eman horren inguruan.

Izkoren esanetan, azkenaldian Audientzia Nazionalean gero eta sarriago irekitzen ari diren halako prozedurak "mendekuagatik" dira, eta "ingeniaritza juridikoa" egiten zen garaiak gogorarazten ditu. Abokatuak uste du auzi hau ez dela harago joango, baina salatu du halakoek giza eskubideei loturiko "kostu sozial eta politiko" bat izaten dutela.