Intersexualitate terminoarekin gorpuztasun-multzo bat izendatzen da, sistema bitarrak ezartzen dituen gorputz maskulino edo femeninoen definizio estetikoan sartzen ez dena.

Mugarik Gabeko Ingeniaritza lankidetza-elkartearen Aktibisten Eskolak online hitzaldia eskainiko du ekainaren 16ean, 18:00etatik 20:00etara. Hitzaldian intersex narratiba eredu zientifikoan landuko da. Mer Gómezek gorputzen despatologizazioaren aurkako borrokan zein urrats eman behar diren azalduko du. Hitzaldia gazteleraz izango da.

Sistema zientifiko hegemonikoa ez dagoela gizarteetako heteronormatik eta binarismotik kanpo argudiatu du Aktibisten Eskolak. Binarismoarekin nagusi den eredu zientifikoa lerrokatu eta justifikatu egiten dela ziurtatu du eta honek existitzen den gorputz-aniztasunean benetako euskarririk aurkitzen ez duela. Binarismo horren baitan existitzen ez diren gorputzak ikusezinak direla gaineratu du, edo tratamendu klinikoak ezartzen zaizkiela, sistema nagusiari baliagarria zaion dikotomia batean sailkatu ahal izateko.

Saioa bideokonferentziaz egingo da, Jitsi plataformaren bidez. Plaza erreserbatzeko (edukiera mugatua izango da) eta saioaz gozatu ahal izateko, idatzi hezkuntza@euskadi.isf.es helbidera. Posta elektronikoz jakinaraziko da nola sartu, aldez aurretik izena emanez gero.

"Intersexualak, medikuntzak ezabaturiko gorputzak" izeneko 271. LARRUNa bideratu genion gaiari 2022ko otsailean.