Aurtengo selektibitateak agerian utzi du ikasle asko urruti dagoela DBH bukatzean lortu beharreko euskarazko B2 mailatik –berez, Batxilerra bukatzean B2 maila baino gehiago izan beharko lukete–. Hori esan dio Euskadi Irratiko kazetariak Begoña Pedrosa Hezkuntza sailburuari, baina sailburuak ez du egoki ikusi adierazpena, uste baitu selektibitatea “proba isolatua” dela, “helburu jakin bat” daukala eta “kontuz aritu” behar dela, “zeren horrelako adierazpenak egiterakoan ez dugu auzitan jartzen soilik gobernuaren lana, gure profesionalen lana ere jartzen dugu auzitan”. Pedrosarentzat, unibertsitatera sartzeko probak ez du zertan B2 mailaren ziurtagiri izan, baina kontua da legeak bai eskatzen duela ebaluazio bat ikasleek B2 maila lortu al duten egiaztatzeko. Goazen pausoz pauso.

2023an onarturiko Hezkuntza Legeak sortu zituen eztabaiden artean, nagusietako bat euskalduntze eredua izan zen: batetik, PSEk eskatuta A, B eta D ereduak mantentzea erabaki zutelako PSEk eta EAJk, eta bestetik, ikastetxe guztientzat harturiko oinarriak, “euskara ardatz duen sistema eleaniztuna” delakoak, ez zituelako euskalgintzako eragileak konbentzitu –ikastetxe bakoitzak bere proiektu linguistiko propioa egin behar du, ikastetxearen testuinguru soziolinguistikoa abiapuntu hartuta–. Kontuak kontu, helburua bai finkatu zen: ikasle guztiek B2 maila lortu behar dute DBH bukatzean (bai euskaraz, bai gaztelaniaz). Eta neurri zehatzagoen faltan helburu horrek eztabaida eta mesfidantza ugari ekarri zituenez, legeak jasotzen duen 67. artikulua heldu zen: Hezkuntza Sailak ebaluazio-tresna jakin batzuk arautuko ditu, irakasleek eurek ikasleen emaitzak baloratzeko eta B2 maila eskuratzen dela bermatzeko.

Zehazki zer zen alderdi politikoek Jokin Bildarratz orduko Hezkuntza sailburuarekin hitz egin zutena? Bada, DBH bukatzen zuten ikasleei ebaluazio jakin bat egingo zitzaiela ikastetxeka, ebaluazio diagnostiko moduko bat, ikasleen euskara maila neurtzeko, eta ebaluazio horrek helburu izango zuela ikastetxean zegoen maila ikustea –ez ikasleei kontuak eskatzea–, B2 bermatzen ez zuten ikastetxeei bitarteko zehatzak jartzeko eta ikastetxe horietan neurriak hartzeko.

Hain justu, horren guztiaren inguruan galdetu dio Ikoitz Arrese EH Bilduko legebiltzarkideak Begoña Pedrosa sailburuari. Zertan da 67. artikulua? Non daude martxan jarri behar ziren ebaluazio-tresnak? “Nola egiaztatzen du Hezkuntza Sailak ikastetxe guztietan helburuak bete direla”? Erantzunaren zain geratuko gara.