Asteartean, 8:30etan, ikasle mugimenduak agerraldia egin du EHUko Arabako campuseko Letren Fakultatean, jasaten ari diren “kriminalizazio kanpaina” salatzeko. Komunikatua bi ikaslek irakurri dute eta 200 ikasletik gora batu dira atzealdean. Ikasleek adierazi dutenez, otsailaren 23an, Antonio Tejero guardia zibil eta militarrak gidatutako estatu kolpe saiakeraren urtemugan, VOXek egindako agerraldiari emandako erantzunetik abiatu da kriminalizazio kanpaina. Salatu dute komunikabide batzuek istiluak egon zirela argitaratu zutela, baino gazteek “ehunka ikasle arazorik gabe mobilizatu” zirela adierazi dute, “probokazio oro gaindituta”.

Agerraldian EAJri eta eskuin muturreko zenbait komunikabideri leporatu diete kriminalizazio kanpaina bultzatu izana. El Correo jarri dute adibide gisa, zeinak ikasleen esanetan, IASeko militanteak “eskuorriak banatu” izanagatik kriminalizatu dituen eta militanteak bizikletarekin “unibertsitate inguruak patruilatzen” ibili zirela asmatu zuen.  

Bestetik, EHUko 40 irakaslek idatzitako gutunari erantzun diote eta diskurtso “autoritarioa” eta “militantziaren aurkako gorrotoa” ezkutatzen dituela azpimarratu dute. “Adierazpen askatasunaren izenean”, unibertsitatean ideia “faxista” eta  “zapaltzaileak” zabaldu zituztela salatu dute, eta campusa "poliziaz betetzea justifikatu” zutela egotzi. Sinatzaileetako bati “haratago joan” izana leporatu diote, “unibertsitate antifaxista bat antidemokratikoa dela, unibertsitate antisionista bat antisemita dela, eta unibertsitate euskaltzalea baztertzailea dela” esateagatik. 

Hainbat eskakizun egin dituzte: ikasle mugimenduaren kontrako kriminalizazioarekin amaitzea; unibertsitatean “pentsamendu kritikoa eta eskubide politikoak” babestea “unibertsitate eredu autoritarioaren aurrean”; eta unibertsitateak eztabaidarako eta pentsamendu kritikorako gune askeak izatea.