4.302 ikaslerekin hasi du ikasturtea Seaskak, aurreko ikasturtean baino 39 gehiago (11 gutxiago Haur eta Lehen Hezkuntzan, 49 gehiago kolegioak eta Etxepare lizeoa batuta). Testuinguru demografiko ezkorrean, ikasle kopuru orokorrari eutsi izana azpimarratu nahi izan dute ikastolek, eta erronka gisa jarri dute aurrerantzean ahalik eta familia gehienetara iristea, euskaldunak izan edo ez, etapa guztietan euskarazko murgiltze eredua eskaintzen duen sare bakarra delako, “euskararen etxeko transmisioa ahultzen ari den honetan”.

Azkainen (Lapurdi) ikastola berria estreinatu dutela eta ikasturtean zehar Beskoitzen (Lapurdi) eta Arberoan (Nafarroa Beherea) ere eraikin berria izango dutela adierazi dute. Hain justu, kolegioetako eta lizeoko ikasle kopuruaren hazkundeari erantzuteko, espazio, langile eta baliabide gehiago bideratzea dute helburu. Ildo berean, lizeo orokorrean, sail teknologikoetan eta lanbide heziketan hezkuntza eskaintza zabaltzea eta dibertsifikatzea dute erronka, “gazte bakoitzak bere proiektua euskaraz eraiki ahal izan dezan”.

Prentsaurrekoan adierazi dutenez, inklusioa da euren “ardatz nagusietako bat” eta ikasle guztiei erantzuteko prestakuntza eta baliabide propioak indartzen segitzeko asmoa azaldu dute: “Estatuak Seaskako ikastolei eskaintzen ez dizkien baliabideei gure bitartekoekin erantzuten diegu”.

Digitalizazio arduratsua eta aniztasuna

Euskal Herriko Ikastolen Elkarteak Seaskako ikasleen sartzea baliatu du ikasturteari hasiera emateko, eta jakinarazi du Euskal Herriko 115 ikastolen artean 53.760 ikasle bilduko dituztela aurten. Euskalduntzea oinarri nagusi dutela, arlo pedagogikoan bi eremutan jarriko dute arreta berezia: batetik, digitalizazio arduratsua eta burujabetza teknologikoa, eta bestetik, aniztasuna eta sarbide unibertsala. Ildo horretan, zera aurreratu dute: “Etorri berrien harrera-prozesuak sendotuko ditugu euskal dimentsioan murgiltzea errazteko, sarbide unibertsala bermatzeko tresnak garatzen jarraitzearekin batera”.

Protesta Bernat Etxeparen

Bestalde, Baionako Bernat Etxepare lizeoko langileek lanuztea egin dute, LAB sindikatuak deituta. Administrazio kontseiluak hitzarmen kolektiboa bertan behera utzi duela diote, negoziazio prozesurik egin gabe. Seaska osorako hitzarmena negoziatu asmoz, elkarrizketa eskatu die sindikatuak Ipar Euskal Herriko Ikastolei.