1.465,2 milioi eurotan baloratutako salmentak eta 219,6 milioi euroko mozkin garbiak. Emaitza ekonomiko horiek utzi ditu 2025ak Vidralarentzat. Gaur aurkeztu ditu Laudioko multinazionalak iazko kontu ekonomikoak. Zehaztu dutenez, 6,24 euro irabazi dituzte duten akzio bakoitzeko, eta zorra 248,3 milioi eurotik 105,3 milioi eurora jaitsi dute.

Pozik azaldu dira konpainiako buruak lortutako emaitzekin, "negozioaren sasoi onaren" seinale eta aurrera eramandako "erabaki estrategikoen" ondorio direla uste dutelako. “Gure errentagarritasuna sendotu dugu, kutxa sortu dugu modu iraunkorrean eta irmo jokatu dugu, Vidrala gaur egun nabarmen hobeto prestatuta egon dadin etorkizunera begira”, nabarmendu dute.

Zorra 248,3 milioi eurotik 105,3 milioi eurora jaitsi du multinazionalak. 

Diru gehiago akziodunentzat

Era berean, multinazionalak iragarri du %15eko igoera aurreikusten duela aurten akziodunei banatuko dizkieten dibidenduetan. Lehen banaketa iragan otsailaren 13an egin zuten, eta uztailean aurreikusten dute egitea bigarrena. Orotara, akzioko 1,75 euro ematea aurreikusten dute aurten, 61,6 milioi euro guztira. Dena den, azken kontu hori onartzeke dago oraindik, aurtengo akziodunen batzarrean. Hain zuzen, batzar horretara bertaratzen diren akziodunek 5 zentimo jasoko dituzte akzioko, pizgarri moduan.

2022tik hona urtez urte handituz joan da akziodunei banatutako diru kopurua, enpresak berak zabaldutako grafiko honetan ikusi daitekeenez:

Gainera, enpresak gogorarazi du iragan abenduan iragarri zutena: 350.000 akzio erosiko dituztela 33 milioi euroko gehienezko prezioan, akzio bakoitzeko jasotzen den diru kopurua handitzeko.