Ebola kasuak milara iritsi dira nazioartean, baina Unicefeko osasun zerbitzuak Kongoko Errepublika Demokratikora begira daude: birusaren epidemia dago herrialdean eta 2,95 milioi haur eta nerabe kutsatzeko arriskuan daude. Hala ohartarazi du haurren eskubideen aldeko agentziak prentsa ohar batean.

Hilabete baino gehiago igaro da herrialdean gaixotasunaren epidemia areagotu zenetik. Gaixotasunaren aldaera berri bat antzeman zuten, zeinak momentuz ez duen tratamendurik ezta txertorik ere. Kongoko Gobernuak jakinarazi duenez, gaur gaurkoz 254 pertsona hil dira epidemiagatik. Ituri eskualdea da epidemiaren epizentroa, herrialdearen ekialdean.

Unicefek haurren osasuna du jomugan: ekainaren 19ra arteko datuen arabera, ebola kasuen %15ak eta hildakoen %25ak 18 urtetik beherakoei dagozkie. Ebola antzematen dieten haur eta nerabeek kutsatutako helduek baino aukera gehiago dituzte hiltzeko, zehazki, ia aukera bikoitza. Ordea, datuak behin-behinekoak dira, probak egiteko baliabideak hobetu badira ere, zaintzak eta kontaktuen arakatzeak murritzak izaten jarraitzen dutelako.

Azpimarratzekoa da haurrak bizi diren testuingurua: "Haurrak egoera ahulean zeuden birusaren aldaera baino lehen. 5 urtetik beherakoen erdiek baino gehiagok desnutrizio kronikoa dute, eta txerto-tasak murritzak dira. Bostetik batek baino gehiagok ez dute inoiz jaso difteria, tetanosa eta eztularen aurkako txertoaren lehen dosia", azaldu du Unicefek. Baldintza horiek ebola are "arriskutsuagoa" izatea dakarte. 

Afrikako osasuneko profesionalek ohartarazi dute aldaera berriak 2014 eta 2016ko Afrika mendebaldeko epidemia gainditu lezakeela. Hamaika milioi pertsona hil ziren garai haietan. 

Kutsatzetik haratago

Gogoratu dute, kutsatuz gero, haurrek zenbait zerbitzutarako sarbidea gal dezaketela, hala nola: osasun-laguntza, elikadura, txertoa edota hezkuntza. Ez hori bakarrik, eskualdeko 135 haur umezurtz geratu dira gaixotasunaren ondorioz.

Egoera "larriagoa" da Kongoko Errepublika Demokratikoan, gatazka eta desplazamenduengatik, haurrek urteak daramatzatelako indarkeriaz inguratuta. Horrekin lotuta, epidemiak emakumeen eta nesken aurkako indarkeria arriskua areagotzen du, Unicefen arabera.