Hondartza artifizialak egiteko dikeen eraikuntza gelditu dute Santanderren

  • Santanderreko badiako La Magdalena eta Los Peligros ingurunean bi itsas-murru luze egiten ari da Espainiako Gobernua, baina herritarren protesten ondorioz eten egin dute obra, itsasaldea kaltetu eta pasaia itsusten duelako.

Urko Apaolaza Avila @urkoapaolaza
2018ko urriaren 04a
Santanderreko La Magdalena hondartzan egiten ari diren murrak 200 metro luze du eta itsas korronteak eta ingurumena kaltetu ditu (arg.: Espainiako Gobernua)

Ingurune paregabea da Santander ondoko La Magdalena itsas-muturrekoa, hantxe dituzte espainiar aberats ugarik euren etxeak –tartean Botín familiak– eta hara joan izan dira santandertar asko ere bainua hartzera edo pasioan. La Magdalena eta Los Peligros hondartzak baina, Kantauri itsasoaren kapritxoz asko txikitzen dira neguan eta horren ondorioz hondarra eraman behar izaten dute uda sasoirako –Euskal Herriko hondartza askotan egin izan den bezala– sos batzuk gastatuz.

Iñigo de la Serna Sustapen ministro ohia hiriko alkate zenean, “gastu” hori saihesteko ideia bururatu zitzaien: 200 metro luzeko bi itsas-murru egitea harearen mugimendua eragotzi eta hondartzak artifizializatzeko. Galdeketa moduko bat egin zuten inguruko herritarren artean –gero salatu dute informazio eta gardentasun falta–  eta ustezko baiezko emaitza baliatu zuten proiektuarekin aurrera egiteko.

Lehen murrua aurrera zihoan heinean konturatu dira Santanderko bizilagun eta eragileak hanka sartzeaz: paisaia erabat itxuraldatzeaz gain, ur-garden eta biziak mortu bilakatu dira, eta gainera, beldur dira badiako biosferari kalte egingo ote dion.

Salvar La Magdalena. Escolleras Fuera elkarteak artikulaturik oposizio mugimendu handia izan da urte osoan eta 1.500 pertsonako bilkurak egin izan dituzte hondartzan –obretan ere sartu izan dira poliziek borraz jo gabe–. Kantabriako Parlamentuak, bestalde, murruen eraikuntza gelditu eta ingurua lehengoratzea eskatu zuen talde guztien babesarekin, PPrena izan ezik.

Magdalena penintsula inguruko herritarrak –asko klase sozial ertain eta altukoak– protestak egin eta dikearen obrak okupatu dituzte (arg: Salvar La Magdalena. Escolleras Fuera)

Orain, Pedro Sánchezen exekutiboak eten egin ditu obrak Trantsizio Ekologikoko ministerioaren erabakiz, “guztiz eta mugarik gabe”, eta azterketa fasean dago egoerari aterabidea eman ahal izateko. Santanderreko PPko alkateak, Gema Igualek, erabaki horrek eragingo duen kostua zein den argitzeko eskatu dio Espainiako Gobernuari: “Urte osoan santandertarrek hondartzez gozatzeko aukera bakarra hori zen”, argudiatu du.

Aitzitik, proiektuaren kontrakoek gogorarazi dute dikeak eraikitzeko gastatu nahi den diruarekin (2,5 milioi euro), 40 urtez hondarra berrezarri daitekeela udaran, orain arte egin den bezala, inguruneari bere izaera naturala kendu gabe: hondarraz gain arroka, goroldio, izkira eta kaioek ere osatzen baitute itsasertza.

La Magdalena eta Los Peligros hondartzak obren aurretik.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Aztarna ekologikoa  |  Espainia  |  Itsasoa

Aztarna ekologikoa kanaletik interesatuko zaizu...
Azkenak
EGILEA
Eguneraketa berriak daude