Jatorrian, duela aste batzuk HuggingFace plataforman Antton eta Maider argitaratu zituzten ahotsak daude. TTS modeloak dira, hau da, Text-To-Speech, testutik ahotsera; programa edo makina jakin baten output edo emaitzak "irakurtzeko" bidea dira; beti ere, programa edo dena delakoak hori euskarazko testuz emateko gauza bada. TTS hauek HiTZ zentroak eta Aholab ikerkuntza taldeak (EHU) garatu eta elkarbanatu dituzte, IKER-GAITU eta ILENIA proiektuen baitan (hilabete hasieran argitaratu genuen albistea). Baina alderdi teknikotik zailtasunak planteatzen zituzten beste proiektu batzuetan integratzeko, eta, egitekotan, ezagutza aurreratua behar zen.

Hori ikusita, Itzune taldetik Maider* eta Antton* berri batzuk garatu dituzte, ahots-klonak nonbait, baina, ñabardura teknikoen aldetik VITS arkitekturan eta ONNX formatuan daude orain, Piper motorrerako baliagarriak. Hemen argitaratu dituzte:

• Maider: itzune/maider-tts
• Antton: itzune/antton-tts

Eta orduan, ahots horiek Piperren integratuta, gero Home Assistant-ek erabil ditzake goiko irudiak erakutsi bezala. Hau garatu duen Itzuneko programatzaileak (Urtzi Odriozola) artikulu honetan zehaztu duenez Piper banaketa ofizialean ez daude euskarazko ahots hauek, eta hortaz, beste lanketa extra bat ere eskatzen du eragiketak, baina eskaera egina dago, eta espero daiteke laster integratuko dutela.