Martxan da ARGIAren Hezkuntza kanal berritua. Dagoeneko gaiari egiten diogun jarraipen zabalak segida izango du albiste, erreportaje, elkarrizketa eta zutabe ugariren bidez, diseinu ukitu bereziekin, eta aukera gehiagoz hornituta, hala nola artikuluetan eta sortzen diren gogoeta eta eztabaidetan iruzkinak utzi ahal izatea –komentarioak ikusgarri jarriko ditugu Iruzkinen txokoan, irakurleek iruzkinak utzi ahala–, hezkuntzaz ARGIAn publikaturiko guztiaren inguruan bilaketak egitea, eta heziguneetako proiektu interesgarriak edo bestelakoak partekatzeko hezkuntza@argia.eus emaila baliatzea.

Astero, Etxerako lanak

Hezkuntzari eta heziketari (eskolari nahiz etxeari) erreferentzia egiten dion podcast berriak galderak ditu abiapuntu eta ildo nagusi. “Etxerako lanak” du izena eta Mikel Garcia Idiakez kazetariaren gidaritzapean, astelehen goizero gai bati helduko zaio, eztabaida eta gogoeta pizteko asmoz. Gai jakin horretan aditu direnen iritziak eta proposamenak jasoko ditu Garcia Idiakezek, eta lagun berezi bat ere izango du alboan: Eider ikasle fina. 13 urteko orojakilea arbelera aterako da astero-astero, eztabaidagaiari buruzko pistak, datuak edota gakoak emateko.

Podcastaren lehenengo atala astelehen honetan bertan abiatu da eta sailaren titulua baliatuz, ikasleei bidaltzen zaizkien etxerako lanez aritzeko aprobetxatu du tartea kazetariak. Zertan dira lagungarri eta zertan ez? Ba al dute zentzurik? Auzi klasikoari tiraka, Lurdes Imaz guraso elkarteko koordinatzailea eta Iñaki Larrea irakaslea izan ditu bidelagun Garcia Idiakezek. “Etxerako lanak, zertarako?” lehenengo atala lotura honetan entzun dezakezu.

Suizidioa ez denean tabua

“Ikusi eta ikasi. Esperientzia onak partekatzen” bideo-erreportajeen saila ere martxan da. Hilero, asteko bigarren astelehenetan, ikastetxe batera egindako bidaia kontatuko dugu bideo-erreportaje bidez, martxan duten proiektu edota dinamika jakin bat ezagutzea helburu. Eskoletan egiten dituzten praktika onak jasotzeko eta partekatzeko apustua egin du ARGIAk. Sail honetan, ARGIAko Mikel Garcia Idiakez kazetariarekin eta Eneritz Arzallus Alustiza eta Manex Moreno Uharte ikus-entzun taldeko kideekin batera, Bira Produkzioak kooperatibako lagunek ere parte hartzen dute errodajeetan.

Lehenengo atala ikasleen ongizate emozionalari eta suizidioaren prebentzioari eskaini dizkiogu eta Abadiñoko Matiena institutura gerturatu da lantaldea, hezkuntzak gaur egun duen erronka potoloenetakoari nola heltzen dioten ikusteko. “Suizidioa ez denean tabua” izeneko bideo-erreportajea lotura honetan ikusi dezakezu.

Nobedadeak horiek izanik ere, hezkuntzaz diharduten ARGIAko kazetari eta kolaboratzaileek eskola munduko azken gertakari, eztabaida eta gogoetei eustea dute erronka, eta gogotsu heldu diote desafioari, orain gainera txoko berezia baitu ARGIAk horien guztien erakusleiho: Hezkuntza kanala.