Seaska Ipar Euskal Herriko ikastolen federazioak antolatutako jaialdiaren irabaziak Donapelauen (Nafarroa Behera) lizeo berria eraikitzera bideratuko dituzte.

Parisek baxoko azterketen zati bat euskaraz egitea ukatu duenez, euskaraz jarduteko eskubidea aldarrikatzeko elkarretaratzea antolatu dute. 17:00etan da hitzordua, Araba gunean. Bertan, argazki erraldoi bat ateratzeko asmoa dute, Koldo Rodríguez Herri Urratseko antolatzaileak adierazi duenez, “munduko eta Frantziako agintariei erakusteko zein den gure hautua”. Erik Etxerart Seaskako lehendakariordearen esanetan, “nork bere hizkuntza egitea eskubide unibertsala da. Borroka hau ez da bakarrik Seaskarena, euskaraz ikasten duten guziena da”. Horregatik Rodriguezek Herri Urrats euskararen aldeko festa nazionala izatera deitu du, Berria-k jaso duenez.

Antolatutako zazpi guneetan hainbat ekintza eta jarduera antolatu dituzte: pailazoak; janari eskaintza anitza; haur txokoak puzgarri eta animazioekin; bertso saioa; txarangak; eta kontzertuak. Kontzertuen artean, Anje Duhalde, Olaia Inziarte, Janus Lester, Lin ton taun, Xiberoots, Auhen, Mirua, Niña Coyote eta Chico Tornado eta La Txama egongo dira. Horiekin batera, Herri Urratsen hirugarren maketa lehiaketako irabazlea: Gar. 

Aurten txartelen prezioak erdira jaistea erabaki dute, 0,65 eurotara, eta edalontziak etxetik eramateko eskatu dute, hondakin gutxiago sortze aldera. Bertara iristeko autobusak antolatu dituzte zenbait herrietatik.