Euskara eroso ikasi eta bizi leloa errepikatuko du AEKk aurten, baina iazko karteleko besaulkia alfonbra batek ordezkatuta: “Alfonbra gonbidapena da, euskara ikasteko ustezko zailtasunen beldur den horrentzat”, azaldu du AEKko Nazio Kontseiluko kide Aize Otañok. Euskara kalera atera nahi dutela berretsi du: horretarako, “lehenik eta behin euskaltegiak bete behar ditugu, ez dakienak ikasteko, dakienak hobetzeko, praktikatzeko…”.

Pizkundea erronka

Aurkezpenean, ekainaren 13ko Euskaltzaleon Martxa hartu dute gogoan: euskarak eta euskaldunon komunitateak bizi dugun “larrialdi linguistikoaren” aurrean, pizkunde berria aldarrikatu zuten, erronka nagusi bat helmuga: 2036. urterako 300.000 euskaldun gehiago izatea, alegia, urtez urte 30.000 euskaldun oso irabaztea hamar urtetan. Bide horretan, helduen euskalduntze-alfabetatzea gako estrategikoa dela argi du AEKk: “Horixe da euskaltegion egitekoa”.

Dirulaguntza berriak

Euskara Bonua estreinatuko dute Araba, Bizkai eta Gipuzkoako ikasleek: A1, A2 eta B1 mailetan matrikulatzen direnek, 120 euro ordainduta, lau urtez ikasi ahal izango dute, eta ez dute gehiago ordaindu beharko. Nafarroan, berriz, A1 mailako ikasleei A2 mailakoak batuko zaizkie eta %100ean berreskuratu ahal izango dute matrikula. Ipar Euskal Herrian, enpresek eskaintzen dituzten formaziorako aukerak baliatu ditzake langileak, euskara doan ikasteko. Doakotasunaren bidean bereziki EAEn eman diren urratsak txalotu ditu AEKk: “Ez da nahikoa, baina horixe da bidea”.

Baliabide ekonomikoez gain, funtsezko jo dituzten beste batzuk dira helduen euskalduntze-alfabetatzearen inguruan agentzia berri bat sortzea erakunde eta gizarte-eragileen jarduna koordinatzeko, pertsona migratuen harrera linguistikorako baliabide eta erraztasunak handitzea, eta lan munduan euskararen presentzia areagotzeko araudi, baliabide eta plangintzak sustatzea.

1976-77 ikasturtean ikasle kopurua %300 handitu zen, “eta ikasle-uholde horrek beste dimentsio bat eman zion helduen alfabetatze-euskalduntzeari”. Mugarri hark 50 urte bete dituela ere gogoratu nahi izan dute aurkezpenean.