Azkaine, Senpere, Urruna, Ziburu, Biriatu, Arbona, Ahetze, Hendaia, Sara eta Donibane Lohizuneko hautetsiak elkartu ziren Zokoan. Salatu zutenez, 2008ko hauteskundeetan botoen %20 eskuratu zuten arren, ez dute ordezkaritzarik Hego Lapurdiko mankomunitateko kontseiluan, alkateek zuzenean hautatzen baitituzte euren ordezkariak.

Kazeta.info-k azaldu duen moduan, abian den errolda-eguneraketak aldaketak ekarriko dizkio Hego Lapurdiko Herri Elkargoari: "Espero bezala, Hendaiak 15 000 biztanleen marra gainditzen badu, herri elkargoak 'aglomerazioa' bilakatzeko eskaera egingo duela baieztatu berri du Michel Hiriart lehendakariak". Izendapen horren bidez, diru-sarrera handiagoak eta eskuduntza berriak ekarriko lizkioke Zokoan bere egoitza duen mankomunitateari. Besteak beste, Lapurdiko eskualde horretan balore estrategikoa hartzen duen garraio antolaketaren alorrean eskuduntza zabalak lortuko lituzke.

Batasunerako deia

Bil Gaiten plataformaren deiari erantzunez, bestalde, hautetsiek adierazi zuten elkarlanean jarraituko dutela ezkerrekoa eta abertzalea den proiektua aurrera eramateko.