Antolatzaileek adierazi dutenez, Kubaren aurkako AEBen zigorrak gero eta gogorragoak dira eta urtarrilaren amaieran Donal Trumpek agindutakoekin kubatarren bizimodua oso egoera larrira eramaten ari dira: “Setio honek argi itzalaldiak eragiten ditu, gasolina mugatzen du eta horrek eragin handia du herritarren etxeetan, osasun etxeetan edota funtsezkoak diren beste hamaika azpiegituretan”. Horregatik, AEBen enbargoa salatzeaz gain, Trump administrazioaren blokeoa hausten saiatuko dira eta laguntzarako materiala eramango dute, besteak beste, elikadura, sendagaiak eta bestelako hornikuntzak.

Gazako ontzidiekin gertatu ez bezala, pentsatzekoa da ontzidiak ez duela arazorik izango Kubara heltzeko, AEBek petrolio-ontzien aurkako debekua jarri baitu indarrean. Edozein kasutan, blokeo hori nazioarteko arau eta legediaren aurkakoa da, Nazio Batuen Erakundeko adituek berriki jakinarazi dutenez: “Nazioarteko legeak bortxatzeaz gain, berdintasuna eta demokrazian oinarritutako nazioarteko ordenaren aurkako mehatxu larria da”. 1992 eta 2025 artean NBEko Batzar Nagusiak 30 aldiz eskatu die AEBei Kubaren aurkako enbargoa altxa dezaten, baina azken horiek beti egin diote uko eskaerari.

Ontzidiaren izena eta abiapuntua Bogotan urtarrilaren amaieran egin zen konferentzian dago. Jose Martí buruzagi kubatarraren lanari ohore eginda, Gure Amerika izendatu zuten bilkura eta bertan bildu ziren hainbat gobernutako ordezkari, herri mugimendu eta kargu instituzional, “eskualdean elkarlana indartu eta Monroe Doktrinan oinarritzen den AEBen erasoari” aurre egiteko. Dadagoeneko ontzidiaren webgunea ere ireki dute, besteak beste, dirulaguntza biltzeko.

Jeremy Corbyn parlamentari britainiarra, Ada Colau Bartzelonako alkate ohia, David Adler Progressive International kolektiboko kidea, Thiago Avila Gazako Sumud Ontzidiaren sustatzailea, Rashida Tlaib AEBetako kongresista demokrata edota María Fernanda Carrascal diputatu kolonbiarra daude Gure Amerika ontzidian joango direnen artean.