Haserrea sortu da Sestaoko (Bizkaia) hainbat familiatan, Las Llanas kirol-elkarteak haurrentzat antolatutako kirol-campusaren barruan, Guardia Zibilaren Bilboko (Bizkaia) kuartelera eraman baitituzte ikasleak, euren senideei aurrez jakinarazi gabe. Uztailaren 7an izan zen irteera, eta hainbat hedabidek jaso dutenez, besteak beste armak erakutsi zizkieten haurrei guardia zibilek.

Itxura denez, Sestaoko Udalak itun bat dauka Las Llanas klubarekin, baina bertan jasotako baldintzak urratzen ari dira campusean. Izan ere, teorian, jardueren %70ek izan behar dute lotura erdigunean dagoen kirol-modalitatearekin (Las Llanasen kasuan, taekwondoarekin), baina familiek kritikatu dute ez dela hori betetzen ari; eta, horrez gain, haurrei arreta euskaraz emateko gutxieneko baldintzak ere urratzen ari dira campusean, udal-hitzarmenek markatzen dutenaren kontrara. Horiek horrela, ikasleak Guardia Zibilaren kuartelera eraman izanak beste muga bat gainditu du, eta haurren familiak bultzatu ditu kexa formal bat aurkeztera.