Langile Batzordeak batasunari eutsi dio Tubos Reunidoseko zuzendaritzak egin nahi dituen 301 kaleratzeen aurrean. Ia lau orduko langile batzarraren ondoren erabaki dute egun osoko greba egunak eta lau orduko lanuzteak uztartuko dituztela hemendik eta martxoaren hasierara.

Gauzak horrela, enpresarekin bilera dagoen data orotan (otsailak 17, 23 eta 26an eta martxoak 4 eta 9an) egun osoko greba deituko dute eta gainerako egunetan lau orduko lanuzteak egingo dituzte txanda bakoitzeko.

Beharginen ordezkariek azaldu dute ahalegina egin dutela enpresari ahalik eta minik handiena egiten, lankideen kaltea murriztuta. "Labeak duen funtzionamendu erarekin, lau orduko lanuzteekin ia geldirik egongo da egun osoa", aipatu dute.

Enpresaren jokaldia bilera izorratzeko

Batzordeko kideek, gainera, azpimarratu dute zuzendaritzak zikin jokatu duela langileen arteko giroa okertzeko batzarraren atarian. Salatu dutenez, asteartean izandako bi txandetan altzairutegiko beharginei ziurtatu diete guztiak kaleratze zerrendan daudela. Ijezketa atalekoei, aldiz, jarraituko dutela adierazi diete.

Hala eta guztiz ere, eta zailtasunak zailtasun, batzarrean ekintza batasuna mantendu dute eta batzordeak sortu dituzte langileek protesten antolakuntzarako. Propaganda, erakunde komunikazioa edota erresistentzia kutxa taldeak eratu dituzte hurrengo eguneko ekimenak prestatzeko. Egutegian markatutako data bat Aiaraldeko Ehun Industriala Sustatzeko Mahaiaren hurrengo bilerarena izango da, aurreratu dutenez.