Gizonezko bat hil da Lizarran, indarkeria matxistagatik salatua izan eta Poliziarengandik ihes egitean
Laugarren pisuko leiho batetik erorita hil da. Foruzaingoak ikerketa abiatu du heriotza ikertzeko. Emakumea bere bikotekide ohia zen eta urruntze agindua zuen, gizonezkoak aurrekariak baitzituen eraso matxistak egiteagatik.
53 urteko gizon bat hil da Lizarran (Nafarroa), bart goizaldean, asteartean, Santiago plazako etxebizitza bateko leihotik erorita. Iturri ofizialen arabera, Poliziarengandik ihesi zihoan, ustez indarkeria matxista egiteagatik salatua izan ostean.
Lizarrako Udaltzaingoak azaldu duenez, asteartean 02:00ak aldera, Nafarroako SOS Deien abisua jaso zuten Santiago plazako etxebizitza batean indarkeria matxistako erasoa gertatzen ari zela. Erasotua izaten ari zen emakumeak egin zuen deia.
Udaltzaingoa etxebizitzara bertaratu zenean, gizonezkoak ihes egin zuen eta beste etxebizitza batera pasatzen saiatzean, lehiotik erori eta hil egin zen. Diario de Noticias de Navarra egunkariak jaso duenez, erasotzailea emakumearen bikote ohia zen eta urruntze agindua zuen, indarkeria matxista egiteagatik. Lehen datuak dira, Foruzaingoak ikerketa abiatu baitu heriotza ikertzeko.
