"Gogotik saiatu gara elkarrizketa eta negoziazioaren bidez ekiten, eta pazientzia handia erakutsi dugu. Baina enpresaren partetik ez dago borondate errealik gure aldarrikapenez hitz egiteko. Langileak gara, bai, ez bolondresak". Hala azaldu dute Gipuzkoako odol bankuko langileek grebara joko dutela iragartzen duen oharrean.

Martxoaren 30ean eta 31n eta apirilaren 1ean eta 2an egingo dute greba Gipuzkoko Transfusio eta Giza Ehunen Euskal Zentroko beharginek.

Azaldu dutenez, lan-hitzarmena berritu gabe dute 2013tik eta enpresak duela urtebete hura negoziatzeko borondatea azaldu bazuen ere, "ez du bete" hitz emandakoa. Hala "nazkatuta eta kezkatuta" azaldu dira eta ezinbestekotzat dute lehenbailehen negoziazio mahaia eratzea.

Lan-hitzarmenaren aldarrikapenaz gain, langileen garapen profesionalaren deialdia betetzea ere eskatzen dutela azaldu dute, tartean badagoelako hainbat langileri eragiten dien sententzia judizial bat, eta hortik kanpo garapen profesionalaren deialdia ezartzea dagokien langile gehiago ere. Euren ustez zentzuzkoa da lan-hitzarmen berriaren negoziazioa "baliatzea" gai horri eusteko.

"Enpresari eta Osakidetzari arduraz joka dezatela eskatzen diegu", esan dute. Grebarekin batera mobilizazioak egingo dituztela ere iragarri dute, bai Donostiako Antigua auzoan duten egoitzan, bai Donostiako Ospitalearen aurrean ere.