Otsailaren 9tik 11ra bitarte zuten deitua greba trenbide sektorean CCOO, UGT eta Semaf sindikatuek. Oscar Puente Espainiako Garraio Ministroarekin egindako azkeneko bileratik akordiorik gabe amaitu ostean deitu zen lanuztea, lan gatazkari irtenbidea emateko asmorekin. Astelehenean ministroarekin izandako bileraren ondoren, ordea, bertan behera utzi dute greba deialdia aipatu sindikatuek, trenbide eredua aldatzeko eta segurtasun estandarrak berreskuratzeko negoziaketak ireki baitituzte ministroarekin. Asteartean, beraz, ez dute grebara deitu; deiari eutsi diote, ordea, CGT, SF-Intersindical eta Alferro sindikatuek osatzen duten gutxiengo sindikalak.

Eremu pribatu eta publikoko 34.000 langile zeuden grebara deituta: 13.000 Adifen, 15.000 Renfen, 450 Iryonen, 400 Ouigon, 1.500 Serveonen eta 4.000 Logirailen. Astelehenean hasitako grebak zenbait zerbitzu bertan behera uztea eta atzerapenak egotea eragin du, istilu handirik eragin gabe.