“Israelgo armadak Gazan egindako ekintzen biktima zuzena” dela “egiaztatu” delako onartu du Francisco de Jorge Auzitegi Nazionaleko epaileak Reffat Alathamma mediku gazatarra akusazio partikular gisa, Orain atariak jaso duenez. Sidenorreko presidente Jose Antonio Jainaga eta enpresako beste bi zuzendari Israelgo Israel Military Industries (IMSI) arma-konpainiari altzairua saltzeagatik auzipetu dituzte, Asociación Comunitat Palestina de Catalunya-Terra Santak aurkeztutako kereilaren eraginez.

Alathamma Gazako genozidioagatik Auzitegi Nazionalean deklaratu duen lehen palestinarra da, eta emaztearekin eta sei seme-alabekin bizitako genozidioaren berri eman zuen deklarazioan. Etengabeko leku aldatzeez gain, mediku bezala izandako lan karga eta arriskuen berri eman zuen. Duela hiru hilabete irten zen familia Gazatik, Hamasek eta Israelgo Gobernuak su-etena adostu zutenean. 

Epailearen erabaki hau ezagutu aurretik, fiskalak Sidenor enpresan egindako erregistroa baliogabetzea eskatu zuen, dokumentazioa zuzenean enpresari eskatu behar zitzaiola iritzita. Kontrabandoa salbu bestelako delituen akusazioak erretiratzea ere eskatu zuen. Nabarmentzekoa da Fiskala ez zela bertaratu medikuaren deklarazio saiora.