Helburuak bete dituztela eta pozik agertu dira ELA, LAB, Steilas, Etxalde eta Hiru sindikatuak, martxoaren 17ko greba orokorraren biharamunean Bilbon eta Iruñean egindako agerraldietan: "Gaur atzo baino indartsugoak gara, ez gara geldituko gutxieneko soldata propioa lortu arte", adierazi dute.

Azaldu dutenez, 1.500 euroko gutxieneko soldata propioa "neurri beharrezkoa, bidezkoa eta bideragarria da", gaur egungo LGS (Lanbide Arteko Gutxieneko Soldata) ez delako nahikoa oinarrizko beharrei aurre egiteko.  Garbi dute gutxieneko soldata duin batek "arrakala-matxista eta arrazistei" aurre egiteko balioko duela, baita patronalak "inoizko irabazi handienak" lortzen ari den bitartean, langileen poltsikoek sufritzen duten debaluazioari aurre egiteko ere.

"Patronalak eta gobernuek sindikatuen ekimena mespretxatu zuten, eta abian jarritako bi bideak ixtea adostu zuten: negoziazio kolektiboarena eta bide politikoa. Bada, M17ari esker, bi bideak berriro ireki dira", esan dute.

Datuek erakusten duten arrakasta

M17ko mobilizazioei buruzko datu eguneratu batzuk ere eman dituzte:  eguerdiko manifestazioetan 125.000 lagunek hartu zuten parte antolatzaileen esanetan, eta arratsaldean egindako 85 manifestazioetan, berriz, "hamarna mila gehiagok". Hori guztia aurrera eramateko 136 greba-batzorde sortu dira herrietan eta 1.700 enpresen atxikimendua izan du: "Greba orokorraren arrakasta neurtu daiteke lortu duen aktibazio sindikal eta sozialaren arabera".

Gogorarazi dute "bide politikoak" zabalik jarraitzen duela, eta hain zuzen, iragarri dute Espainiako Gobernuaren inbestidura ahalbidetu zuten hainbat alderdirekin harremanetan daudela, gaia Madrilera eraman eta hango Kongresuan lege-proposamen bat aurkezteko.

Era berean, bai Eusko Jaurlaritzari bai Nafarroako Gobernuari, "baita alderdi politiko guztiei ere" beharrezko lege-aldaketak bultzatzea eskatu diete, gutxieneko soldataren eskumena lortu dezaten: "Hego Euskal Herriko erakundeek langileen bizi- eta lan-baldintzen inguruan erabakitzeko duten ahalmena handitu behar da".

Amaieran, azpimarratu dute M17a ez dela "egun arrunta" izan, eragin handia izan duela eta "euskal langileen ahotsa" etzun dela "lantokian zein kalean". Hala, gutxieneko soldataren bidez, aberastasunaren banaketaren eztabaida erdigunera ekartzea lortu dutela iritzi dute.