Asteazkenean, etxerik gabeko ehun pertsona baino gehiagoren bizileku diren URSSA eta EGA fabrikak miatzeko eta bertan bizi diren etxegabeak identifikatzeko Polizia operazio erraldoia egin zuten Gasteizen. Ertzaintzaren, Udaltzaingoaren eta Espainiako Poliziaren 70 agentek hartu zuten parte "lapurreta prebentziorako dispositiboan". 120 pertsona inguru banan-banan identifikatu zituzten, batzuei dokumentazioa kendu ere, eta Atzerritartasun Bulegoan aurkezteko hitzordua eman zieten.

Asteazkeneko operazioa salatzeko, Arrazakeriari stop! Elkartasuna URSSA eta EGAko bizilagunekin lelopean mobilizazioa deitu du Gasteiz Antiarrazista taldeak. "URSSAN eta EGAn bizi diren pertsonek eraso arrazista bat pairatu dute, beste behin ere. Poliziaren eta komunikabideen laguntzaz Gasteizko Udalak bortizki jazarri zaie bertan bizi diren ehunka pertsonei", salatu du. Plaza Berrian jarri dute hitzordua, 19:30ean.

URSSA eta EGA fabriketan aspaldi bizi dira kale egoeran dauden dozenaka pertsona. Azken asteotan foku informatiboa bereganatu dute lantegiek. Batetik, Errekaleorrek gertakari larriak salatu zituen: azaldu zuen URSSAn bizi den pertsona talde batek auzokideei eraso egin ziela, batzuk larri zaurituta, eta erasoaren atzean Ertzaintza zegoela. URSSAn bizi den herritar baten lekukotasuna argitaratu zuten Hala Bedik eta Arabako Aleak, Ertzaintzaren ardura baieztatzen duena. Astelehenean agerraldi masiboa egin zuten Gasteizko 47 eragilek, Ertzaintzaren jarduna salatzeko eta besteak beste, kale egoeran dauden pertsonentzako baliabideak eskatzeko. Bestetik, zenbait komunikabidek eta ordezkari politikok fokuan mantendu dituzte bertan bizi diren pertsonak, lapurretekin edo gatazkekin erlazionatuta.

50 asilo eskatzaile "kale gorrian" geratzeko arriskuan

Hilabeteak dira Malitik heldutako dozenaka herritar Espainiako Poliziaren aurrean bizi direla. Asiloa eskatzen dute, eta komisaria horretan egiten dira izapideak. Apirilaren 22an urgentziazko prentsa agerraldia egin zuen Salburuko Harrera sareak. Azaldu zuen hilabeteak zeramatzala pertsona horientzako oinarrizko betebeharrak bermatzen, besteak beste lo egiteko lekua auzo elkartean eta bi elizetan jarrita, baina baliabide horiek amaitzear zeudela. Asilo eskaerak bideratzea eta bien bitartean askatzaileen oinarrizko beharrak asetzea erakundeen lana dela azpimarratu zuten agerraldian, eta ardura hartzeko eskatu zieten.

"Negurako lortutako baliabideak amaitzean larrialdi humanitarioa areagotu egingo da", salatu zuten orduan. Hori horrela da, eta azken egunetan ohartarazi du "igandetik aurrera 50 asilo-eskatzaile kale gorrian" geratuko direla. Egoera salatzeko mobilizazioa deitu du Salburuko Harrera sareak, Erakundeek abandonatuta. Konponbidea orain! lelopean. 19:30ean bilduko dira Martxoak 8 etorbideko biribilgunean, haun da, "haien bizi-lekuan".