Inmobiliaria Vascongada higiezinaren erosketarekin –maizterrekin duela zazpi urte kontratuak sinatu zituena–, 2020an Azora funts putrea Donostiako 320 familiaren etxebizitzen alokatzaile bihurtu zen, eta ordutik hainbat arazo izan dituzte familia horiek. Esate baterako, funts putrearen jabetzako Gros auzoko etxebizitzetako bizilagunek prentsaurrekoa egin zuten 2024ko uztailean, eta Azoraren "gehiegikeriak" salatu zituzten: adierazpenean hitzarmen berritze eza, mobbing immobiliarioa, klausula ilegalak eta fiantzen lapurreta aipatu zituzten, besteak beste.

Amarako Osasun Iturria kalearen egoeraren harira, Kaleratzeak Stop taldeak azpimarratu du funts putrearen helburua alokairu horiei "ahalik eta etekin handiena" ateratzea dela. Gainera, plataformaren esanetan, familiak kaleratu ondoren Azorak etxebizitza horiek aldi baterako alokairuan jarri nahi ditu, Etxebizitzaren Legeak ezarritako prezio mugak eta erreferentzia indizeak saihesteko.

Gauzak horrela, plataformak iragarri du mozio bat aurkeztuko duela Donostiako Udalaren hurrengo osoko bilkuran, honako neurri hauek exijitzeko: Etxebizitzaren Legea baliatuz, Azorak Donostian dituen etxebizitza hutsak desjabetzea; funts putreak amaitutzat jo dituen alokairu kontratuak hiru urtez luzatzea eta berritzea; eta, azkenik, Kontsumobidek Azorak interneteko atarietan argitaratzen dituen alokairuak ikuskatzea, eta zigortzeko Etxebizitzaren Legeak ezarritako prezio mugak urratuz gero.

"Udalak jarrera irmoa erakutsi behar du"

Gaiaren inguruan galdetuta, Donostiako alkate Jon Insaustik adierazi du udalak "gogor" jokatu behar duela Azoraren gisako funts putreen aurka: "Badakigu nola aritzen diren, eta ez dituzte bizitzeko hiriak bilatzen, espekulatzeko baizik. Nik ez dut nahi Donostia espekulatzeko hiri bat izatea". Insaustik gaineratu du Kaleratzeak Stop plataformarekin "harremana indartu" behar dutela.

Udalaren arabera, Donostian 2.200 etxebizitza huts inguru daude gaur egun. Alkateak azpimarratu du etxe huts horiek denak "mobilizatu" behar dituztela administrazioan eskuratu dituzten "erremintekin".