Faxismoa txosnagunetik kanpo" argi irakur zitekeen asteartean Barakaldoko (Bizkaia) txosnetan egindako elkarretaratzean. Herenegun, Bizkaiko Voxeko hainbat kide hurbildu ziren txosnetara, bertako mezu politikoak kriminalizatzeko bideo bat grabatzeko asmoz: gazte batek kargu hartu zien, eta horregatik ertzainek bi pertsona identifikatu ostean, euren kontrako salaketa jarri du alderdi faxistak, bere esanetan. Voxen jazarpenari erantzun diote txosnek, ordea: horrexegatik egin zuten protesta bat astearte arratsaldean, faxismoa txosnagunetik kanpo nahi dutela aldarrikatuz.

Aipatutako momentuaren bideoa sare sozialetan argitaratu zuen Bizkaiko Voxek, eta orduan jakinarazi zuen Poliziak identifikatutako bi lagunak salatu dituela, "hertsapenagatik", "gorroto-delitu baten larrigarriarekin". Goigorri Konpartsako kideek kontzentrazioaren amaieran adierazi zuten azken gertakarien aurrean "faxismoaren aurkako edozein adierazpenen aurkako jarrera" berresten dutela, eta aurre egingo dietela "mezu faxistei eta horien ordezkariei". "Faxistei arnasguneak utziz gero, argi dago handitu egiten direla. Ez dira ongietorriak; ez txosnagunean, ez gure auzoetan, ez gure plazetan eta ez beste inon", gaineratu zuten.

Faxisten jazarpenarekin aski ez, eta horren aurretik, ostiral gauean hain zuzen ere, txosnagunera sartu ziren 20 ertzain eta udaltzain inguru: hainbat pankarta kendu zituzten, hala nola, Israelen eta biolentzia polizialaren aurkako mezuak zeramatzatenak.