Parte-hartzea %57koa izan da, inoiz lehen itzulian izan den ehunekorik handiena. Inkestek ez zuten halakorik iragarri, baina Kolonbiako hauteskundeen lehen itzulian Abelardo De la Espriella eskuin muturreko hautagaia (Aberriaren Defendatzaileak) gailendu da. 656.033 botoren aldea atera dio gaur egun agintean dagoen Gustavo Petro presidentearen alderdiari, Itun Historikoari. Hirugarren gelditu da Álvaro Uribe presidente ohiaren alderdia. Inkesten arabera, botoen %14-22 eskuratu zezakeen uribismoak, baina %6,92an gelditu da.

Ekainaren 21ean egingo den bigarren itzulira begira, hainbat adituk argi dauka ultraeskuinak irabaziko duela, kontuan hartuta uribismoaren hautagaiak, Paloma Valenciak (Zentro Demokratikoa), emaitzak jakin ondoren iragarri duela eskuin muturreko alderdiaren alde egingo duela. Valenciari botoa eman dioten gehienak ere, eskuinekoak dira. Álvaro Uribe presidente ohiak ere, De la Espriella babestuko duela adierazi du. Beste hainbat adituren ustez, ordea, hiru edo hiru milioi eta erdi hauteslek balantzari alde batera edo bestera eragin diezaiekete. 

Bigarren ezustekoa Gustavo Petro presidenteak eman du, sare sozialetan esanda hauteskundeen emaitzak ez dituela onartzen. Presidentetzarako hautagai den Iván Cepedak, Petroren alderdi berekoak, adierazi du "egiaztatu nahi dugun desfase bat" dagoela. Nazioarteko behatzaileak egon dira boto kontaketan. Emaitza ofizialak egun batzuk barru jakingo dira.

Latinoamerikan, eskuin muturreko hainbat agintarik zoriondu dute De la Espriella hautagaia, hala nola, Argentinako presidente Javier Mileik, Ekuadorko Daniel Noboak eta Txileko José Antonio Kastek.