Gasteizen ingurumen arloan teknikari izateko egindako lan eskaintza publiko zein langileentzako barne deialdietako hautagaiei ez zaie derrigor euskara mailarik edukitzea eskatu. Ingelesezko B2 titulua edukitzea galdetzen zaie, ordea, Gasteizko Ingurugiro Gaietarako Ikastegiak (IGI-CEA) ingurumen kudeaketako eta klima-ekintzako goi mailako teknikariak (TSAE) kontratatzeko lan poltsa berrian.

Hala ere, hizkuntzetan ezagutza edukitzeak titulazio mailaren araberako puntuak eskuratzen lagunduko du: alemana, frantsesa eta ingelesa bezalako hizkuntzen gaineko ezagutzak 3 puntura arte emango ditu; ingelesa jakiteak gehienez 8 puntu; eta euskarak gehienez 14 puntu.

Ingelesezko titulazioa ez dutenek ezingo dute lan eskaintzan parte hartu, eta IGIk fundraising edo Europako funtsen bilaketak egiteko beharko dela azaldu du udalak. Haatik, euskarari dagokionez, hautagaiek ez dute nahitaezko hizkuntza eskakizunik egiaztatu beharko, eta bestelako baldintzak beteta eta proba teoriko-praktikoa gaindituta, hizkuntzaren ezagutza maila baloratuko zaie.