Apirilaren hasieran Parisetik matematikako proba euskaraz egitea ukatu ostean, asteartean jakinarazi dute Seaskaren Bernat Etxepare lizeoko ikasleek desobedientziaren bidea hartuko dutela. Ikasle guztien babesarekin emandako prentsaurrekoan, Haize Etchegaray Aracama eta Hodei Lekuona Blanco bozeramaileek adierazi dute ekainaren 12an egingo duten baxoko matematikako azterketa euskaraz erantzungo dutela, euskaraz ikasten dutelako eta “azterketak euskaraz nahi” dituztelako, Kazeta-k jaso duenez.  

2012-2019 urteen bitartean Ipar Euskal Herriko ikasleek azterketak euskaraz egin bazituzten ere, Parisetik egindako erreformarekin, azterketak frantses hutsean egitea inposatu zitzaien. 

Izan ditzaketen ondorioen jabe dira ikasleek: Bordeleko Akademiaren irizpideak jarraituz gero, ez dizkiete euskaraz egindako azterketak zuzenduko. Horregatik, “ezin dute denek bururaino joan”, baina ikasleek “kolektiboan” hartu duten erabakia izan da, Berria-k jaso duenez. Azaldu dute guraso, irakasle eta langileek beren erabakia babesten dutela.

Desobedientziaren transmisioa

Ez da hau ikasleek desobedientzia hautatzen duten lehen aldia. 2021ean ikastetxe berean 40 ikasle inguruk Filosofiako azterketa euskaraz egiteko hautua egin zuten. “Harrotasunez” jarraitu diote belaunaldien arteko desobedientziaren transmisioari, baina azaldu dute ez dietela borroka horren beharra ondorengo belaunaldiei utzi nahi, azterketak euskaraz egiteko eskumena lortu nahi baitute. 

Euskal gizarteari beren borroka babesteko eskatu diote. Horretarako, besteak beste, sinadura bilketa abiatu dute, eta mobilizazioa antolatu igandean ospatuko den Herri Urratsean, 17:00etan Araba gunean.