Pizkunderako deia egina du Euskalgintzaren Kontseiluak. Urtebete baino gehiago da larrialdi linguistikoan gaudela esan zuela. Borja Arbelaitz errenteriarrak ARGIAri adierazi dio herrian talde bat antolatzen hasia zela Kontseiluaren deiari erantzunda, euskararen egoera estuak kezkatuta. Taldeak Oreretako Euskaltzaleon Pizkundea izena du (elkarretaratzea baino lehen egindako elkarrizketa) eta udaleko Lan Eskaintza Publikoaren gaiak lanean harrapatu ditu. Haserre daude eta euskararen aurkako erasoari aurre egitea erabaki dute.

Dozenaka euskaltzale elkartu dira CCOO sindikatuaren atarian, CCOO Euskararen aurkako erasorik ez leloa idatzita daukan pankartaren atzean. Euskal Herrian Euskaraz taldearen banderak ere lehen lerroan egon dira. Errenteriakoa eraso bat gehiago baino ez dela izan azpimarratu dute elkarretaratzean irakurri duten agirian. ARGIAri erreferentzia egin diote erasoaren arduradunak “ipurdi bistan” utzi izanagatik. CCOO sindikatuak “izenetik hasita diola herra euskarari” nabarmendu dute eta galdetu dute: “Noiz arte?”.

Antolatutako erasoak

Antolatuta, hizkuntza politika “geldiarazi” nahi dutela salatu dute. Udalerriko PSE-EEk afera honi lotuta esan duena gogor kritikatu dute. Oarsoaldeko Hitza-k jaso duenez, alderdi sozialistak Errenterian gobernatzen ari den EH Bilduri adierazi dio 25 administrari lanpostutarako C1 maila eskatu izana “neurrigabea” dela, ez diola erantzuten lanpostu horien errealitateari eta araudiaren “oso gaineko” eskaera linguistikoa dela.

Oreretako Euskaltzaleon Pizkundea taldeak PSE-EEri hizkuntza eskakizunak inposaketarekin lotu izana leporatu dio: “Euskara inposaketa dela!!! Nora zoaz, Euskadiko Alderdi Sozialista-Euskadiko Ezkerra? Non ezkutatu duzue lotsa? Hori da Gasteizen negoziatzen ari zaretena? Hori da zuen marra gorrietako bat?”. Inposatutako hizkuntza bakarra gaztelania dela gehitu dute. Administrazioan euskara maila jaistearen alde egitearen aurrean, galdera hauek egin dituzte: “Hori arduragabekeria edo linguizidioa da? Nor da horren arduradun? Euskararen alde dagoenak hori egin dezake? Badakigu ezetz!”.

Taldearen agiria irakurri duenak, pareko euskaltzale guztiei begira, antolatzeko deia egin du, “haiek antolatu dira” esanez. 1960ko hamarkadako pizkundeari erreferentzia eginez, beste behin ere egiteko hauspotu ditu euskaltzaleak: “Gaur izan dadila hasiera berri bat. Pizkunde berri bat Oreretan!”.

Elkarretaratzea bukatutakoan Borja Arbelaitz Oreretako Euskaltzaleon Pizkundea taldeko kidea pozik agertu da bildutako jendearekin, erantzuna “txalogarria” izan dela azpimarratu du, eta gehitu “tamalez Orereta euskaltzaletasunagatik ez dela nabarmentzen”, herri erdaldundua dela. Erasoak herriko euskaltzaleak aktibatzeko balio izan duela dio, eta orain erronka dela euskaltzaleak saretzea eta taldea sendotzea. “Izan ere soka luzea ekarriko du kontu honek”.