Data esanguratsua aukeratu dute mobilizazioa egiteko: uztailaren 14a, 1789an Bastilla hartzearen eguna, Frantziako Jaiegun Nazionala. Eta Espainiako zein Frantziako gizonezkoen futbol selekzioak, FIFA erakunde pribatuak antolatzen duen gizonezkoen munduko futbol txapelketa dirutsuan, aurrez aurre aritu diren eguna. Horixe baliatu dute ehunka lagunek beste behin euskal selekzioaren aldeko aldarria kalera ateratzeko.

Gure Esku, Zazpi Baietz eta Gu ere bai! kolektiboek deituta, Hendaia eta Irun arteko Etorbide Zubi historikoa giza kate batekin gurutzatu dute astearte honetan. 1936an herritar ugarik gerratik ihesi gurutzatu zuten zubi horixe bera; gaur egun herritar ugarik miseriatik ihes egiteko gurutzatu nahi izaten du, baina polizien kontrolek oztopatzen diete.

Mobilizazioa arratsaldeko bostetan hasi da, Euskal Herria, gure selekzioa, gure koloreak lelopean. Futbol munduko aurpegi ezagunak eta hainbat alderdi politikotako ordezkariak izan dira besteak beste, asko elastiko berdea jantzita eta ikurrinak eskuan. EH Bilduk, "muga inposatu, ukazio, debeku eta oztopo guztien gainetik", euskal selekzioaren beharra nabarmendu du. EAJko kideek, berriz, familia argazkia atera eta selekzioaren "ofizialtasuna" aldarrikatu dute.

Amaieran, bertsolarien ondoren, ekimena antolatu duten elkarteetako ordezkari bana igo da oholtza gainera eta manifestua irakurri dute elkarrekin: "Berretsi nahi dugu kirolaren bidez jarraituko dugula herria egiten, herri libre bat egiten", esan dute. "Herri burujabea izan nahi dugu: burujabetza osoa, euskal herritarroi eragiten diguten alderdi guztiez erabakitzeko. (...) Egunotan gizonezkoen Munduko Futbol Txapelketa jokatzen ari da, eta aukera hori aprobetxatu nahi dugu munduari mezu bat bidaltzeko: hau da gure herria, hau da gure selekzioa, hauek dira gure koloreak.

Gure herria, gure selekzioa, gure koloreak. Mobilizazio ederra egin dugu gaur Hendaia eta Irun artean!!! #EuskalHerria #EH #EuskalSelekzioa pic.twitter.com/kRI9weW1Zx

— Gure Esku (@gure_esku) July 14, 2026

Txalo zaparrada batekin hartu dituzte hitzok bertan bildutakoek, eta "ofizialtasuna!" oihua errepikatzen amaitu dute. Iluntzeko futbol partidaren emaitzak berdin die, baina arratsaldean Bidasoan markagailua zazpi eta batekoa izan da.